Սկսվել է Երեւանի ավագանու արտահերթ նիստը: Օրակարգում «Երեւանի քաղաքապետ Հայկ Մարությանին անվստահություն հայտնելու մասին» որոշման նախագիծն է:
Նախքան նախագծի քվեարկությունը՝ «Իմ քայլը» խմբակցության ղեկավար Արմեն Գալջյանը ելույթով հանդես եկավ:
Նա նախ շնորհակալություն հայտնեց Մարությանին՝ այս երեք տարիների ընթացքում նրա կատարած աշխատանքի համար: «Անշուշտ բազմաթիվ կարեւոր հարցեր են լուծվել այս երեք տարիների ընթացքում, որոնք էական նշանակություն ունեն քաղաքի կառավարման տեսանկյունից: Այն նախընտրական խոստումները, որոնք մենք տվել ենք Ձեզ հետ միասին, մի մասն արդեն իրականացվել է, եւ ես լիահույս եմ, որ առաջիկա երկու տարիների ընթացքում կիրականացվի նաեւ դրանց մյուս մասը»,- ասաց Գալջյանը:
Խմբակցության ղեկավարն անկեղծացավ, որ իսկապես ծանր իրավիճակ է, եւ իրենք էլ քաղաքապետին անվստահություն հայտնելու որոշմանը դժվարությամբ են հանգել: Նա նաեւ նշեց՝ շատ կցանկանար, որ այսօր անձնավորված ելույթներ չլինեին, քանի որ Հայկ Մարության անձի նկատմամբ հակակրանք չկա:
«Ինչպես արդեն հայտնի է, մենք քաղաքապետի պաշտոնում առաջադրել ենք քաղաքապետի տեղակալ Հրաչյա Սարգսյանի թեկնածությունը: Պարոն Սարգսյանը «Քաղաքացիական պայմանագիր» կուսակցության անդամ չէ, սա վկայում է այն մասին, որ այս որոշմամբ կուսակցական խնդիր չի լուծվում, այլ արվում է առաջիկա երկու տարիներին քաղաքի արդյունավետ կառավարման համար»,- վստահեցրեց նա:
