Այսօր կառավարության հերթական նիստին ՀՀ առողջապահության նախարար Անահիտ Ավանեսյանը ներկայացրեց երկրում կորոնավիրուսային իրավիճակը եւ պատվաստումների թվերը։ Նրա խոսքով, այս պահին ունենք բավականին լավ համաճարակային իրավիճակ։
Այսպիսով, Հայաստանում իրականացվել է 1,591,809 պատվաստում՝ 920,650 քաղաքացի ստացել է պատվաստման առաջին դեղաչափը, 670,710 քաղաքացի ստացել է երկրորդ դեղաչափը։ Կա արդեն մոտ 500 քաղաքացի, ովքեր ստացել են 3-րդ խթանիչ դեղաչափը։
Վարչապետ Փաշինյանն իր հերթին նշեց, որ կորոնավիրուսային հաջորդ ալիքը անխուսափելի գալու է, եւ մենք պետք է դրան պատրաստ լինենք։
«Մեր բոլորի միասնական խնդիրը կլինի շարունակել պատվաստումներն այնպես, ինչպես մենք դա անում էինք, երբ մեր օրական թվերը հասնում էին 1500-ի, եւ ունենում էինք մահվան 70 դեպք։ Պետք չի, այսպես ասած, դանակը ոսկորին հասնի նոր մենք սկսենք տեղից շարժվել»։
Նա նշեց, որ պետք է այս հանդարտ փուլում շարունակել պատվաստումները։ Վարչապետն ասաց, որ հենց ինքը ընդունել է երրորդ պատվաստանյութը եւ կոչ արեց բոլորին նույնպես ընդունել այն՝ ավելի պաշտպանված լինելու համար։
