Կապանի 31 բնակավայրերից 6-ում կստեղծվի առանձին գործող հաստատություն՝ կրթահամալիրի տեսքով, որտեղ կիրականացվեն նախադպրոցական և դպրոցական ծառայություններ՝ զարգացնելով ենթակառուցվածքներն ու կրթության մատուցման որակը:
ՀՀ կրթության, գիտության, մշակույթի և սպորտի նախարարի տեղակալ Ժաննա Անդրեասյանը հայտնեց, որ արդեն մեկնարկել է Կապան խոշորացված համայնքի գյուղական բնակավայրերի համար՝ կրթական ծառայությունների տեղորոշման և որակյալ կրթության ապահովման նոր մոդելի նախագծումը։ Կապան խոշորացված համայնքի 31 գյուղական բնակավայրերում գործում է 18 հանրակրթական ուսումնական հաստատություն. մյուս բնակավայրերի դպրոցահասակ երեխաները հաճախում են մոտակա բնակավայրի դպրոցներ։
31 բնակավայրերից միայն 6-ում են առկա նախադպրոցական ծառայություններ։ 31 բնակավայրերում ներկայում շահառու երեխաների թիվը շուրջ 1000 է՝ ներառյալ դպրոցահասակ և նախադպրոցական տարիքի 3-6 տարեկան երեխաները:
«Ըստ իրականացված ուսումնասիրությունների և տեղազննությունների՝ 31 բնակավայրերից 6-ում անհրաժեշտ է ունենալ առանձին գործող հաստատություն՝ կրթահամալիրի տեսքով, որտեղ կիրականացվեն նախադպրոցական և դպրոցական ծառայություններ՝ զարգացնելով ենթակառուցվածքներն ու կրթության մատուցման որակը։ Մնացյալ 25 բնակավայրերը կարող են միավորվել 7 կրթական հանգույցներում՝ ձևավորելով կրթահամալիրներ, որտեղ կիրականացվեն թե՛ հանրակրթական, թե՛ նախադպրոցական, թե՛ այլ կրթական ծրագրեր՝ ըստ անհրաժեշտության։
13 վայրերից 5-ի դեպքում անհրաժեշտ է նոր շենքերի կառուցում, որոնցից 3-ի համար՝ մոդուլային սկզբունքով, մյուս դեպքերում՝ կիրականացվի առկա շենքերի վերակառուցում՝ ներառյալ մարզադահլիճները։ Հանգուցային կրթահամալիրների գործունեության համար նախագծվել և ծրագրվել են 8 տրանսպորտային ուղիներ, որոնք պետք է ապահովեն երեխաների անվտանգ տեղափոխումը բնակավայրից բնակավայր՝ ներառելով նաև ուղեկցորդի ծառայությունը»,- ասաց փոխնախարարը։
Անդրեասյանն ընդգծեց, որ և´առանձին գործող հաստատությունները, և՛ կրթահամալիրները պետք է ունենան վերանորոգված շենքային պայմաններ, ուսումնական գործընթացի կազմակերպման համար անհրաժեշտ գույքային և լաբորատոր հագեցվածություն։ Բոլոր հաստատությունները պետք է ունենան նաև որակյալ աշխատակազմ՝ ապահովված համարժեք աշխատանքային պայմաններով։
Իրականացված աշխատանքների համաձայն՝ Կապան խոշորացված համայնքի գյուղական բնակավայրերում ծրագիրն իրականացնելու համար կպահանջվի շուրջ 9 մլրդ ՀՀ դրամ։ Արդեն իսկ մեկնարկել են դրա իրագործմանն ուղղված աշխատանքները, մասնավորապես՝ քաղաքաշինական կոմիտեի կողմից հայտարարվել են նախագծանախահաշվային փաստաթղթերի մշակման աշխատանքները։
Նա շեշտեց, որ նույն մեթոդաբանությամբ՝ Սյունիքի մյուս 7 խոշորացված համայնքներում նույնպես իրականացվում են նշված աշխատանքները, ինչը թույլ կտա ստանալ ամբողջ Սյունիքի մարզում որակյալ կրթական ծառայությունների լիարժեք քարտեզը։ Ծրագիրը քննարկվում է Եվրամիության գործընկերների հետ՝ 2,6 միլիարդ եվրոյի աջակցության համատեքստում իրականացնելու նպատակով։
