«Հայաստան» խմբակցության 12 պատգամավոր չեն կարող երկրից դուրս գալ, նրանց նկատմամբ քրեական գործեր են հարուցվել: Ամփոփիչ մամուլի ասուլիսի ժամանակ այս մասին ասաց ՀՀ երկրորդ նախագահ Ռոբերտ Քոչարյանը՝պատասխանելով հարցին, թե որքանով է արդարացված համարում «Հայաստան» խմբակցության պատգամավորների չընդգրկվելը միջազգային կառույցներում Հայաստանը ներկայացնող խորհրդարանական պատվիրակությունների կազմում:
«Իրականության մեջ մի զգալի մասի համար այդ մասնակցության ճանապարհը փակ է այս իշխանության կողմից: Երբ Սեյրան Օհանյանը չի կարող մեկնել մասնակցելու ՀԱՊԿ-ի խորհրդարանական միջոցառումներին, թույլ չեն տալիս, քննիչը համաձայնություն չի տալիս, որ Սեյրան Օհանյանը գնա և մասնակցի, Արմեն Գևորգյանը չի կարողանում մասնակցել Եվրախորհրդարանի վեհաժողովին: Այն, ինչ արել ենք, արել ենք ստիպելու համար այս իշխանությանը գնալ մի շատ պարզ տրամաբանական քայլի՝ հանել այդ բոլոր արգելքները «Հայաստան» դաշինքի պատգամավորների համար»,- ասաց Քոչարյանը:
ՀՀ երկրորդ նախագահն ընդունեց` իրենց դաշինքի պատգամավորները կարող են օգտագործել այդ ամբիոնները Հայաստանի ազգային շահերը պաշտպանելու համար:
