Աշխարհը շարունակում է զգալիորեն շեղվել նորածինների և մինչև 5 տարեկան երեխաների կանխարգելելի մահերին վերջ դնելու Կայուն զարգացման նպատակներին (ԿԶՆ) հասնելու ճանապարհից. այս մասին ասվում է ՄԱԿ-ի միջգերատեսչական խմբի (UN IGME) կողմից հրապարակված՝ Երեխաների մահացության գնահատականների մասին զեկույցում՝ հայտնում են ՄԱԿ-ի Մանկական հիմնադրամի հայաստանյան գրասենյակից:
Զեկույցի համաձայն՝ 50-ից ավելի երկիր մինչև 5 տարեկան երեխաների մահացության թիրախին մինչև 2030 թվականը չի հասնի, իսկ ավելի քան 60 երկիր՝ նորածնային մահացության թիրախին, եթե անհապաղ միջոցներ չձեռնարկվեն:
ԿԶՆ-ներով նախատեսված է մինչև 2030 թվականը վերջ դնել նորածինների և մինչև 5 տարեկան երեխաների կանխարգելելի մահերին՝ նպատակ ունենալով 1000 կենդանի ծնվածի հաշվով նորածնային մահացության 12 կամ ավելի փոքր մահացության ցուցանիշ գրանցել, իսկ մինչև 5 տարեկանների շրջանում՝ 1000 կենդանի ծնվածի հաշվով մահացության 25 կամ ավելի փոքր ցուցանիշ:
Զեկույցում նշվում է, որ միայն 2020 թվականին ավելի քան 5 միլիոն երեխա մահացել է մինչև իր հինգերորդ տարեդարձը, իսկ 5-24 տարեկան` 2,2 միլիոն երեխա և երիտասարդ:
Հայաստանի Հանրապետությունը զեկույցի համար տվյալներ տրամադրած երկրների ցանկում է: Ըստ այդմ, եթե 1990 թվականին երկրում մանկական մահացության ցուցանիշը կազմել է 42` 1000 կենդանի ծնվածի հաշվով (‰), ապա 2020 թվականին` 10‰: Մինչև 5 տարեկան երեխաների շրջանում մահացության ցուցանիշը 1990 թվականին կազմել է 49` 1000 կենդանի ծնվածի հաշվով, իսկ 2020 թվականին` 11‰: Կարևոր է փաստել, որ երկու ցուցանիշների դեպքում էլ Հայաստանը ԿԶՆ-ներին հասած հատուկենտ երկրների շարքում է:
