Խորհրդարանը երկրորդ ընթերցմամբ և ամբողջությամբ ընդունել է «Հակակոռուպցիոն կոմիտեի մասին» օրենքում փոփոխություններ և լրացումներ կատարելու մասին նախագծերի փաթեթը։
Ըստ նախագծի՝
Հստակեցվում է Հակակոռուպցիոն կոմիտեում հայեցողական պաշտոն զբաղեցնող անձանց իրավական կարգավիճակը: Հակակոռուպցիոն Կոմիտեում 20 ինքնավար թափուր պաշտոնը ժամանակավորապես զբաղեցնող անձանց քանակը համալրվում է ևս 10-ով։
Նախագծի նպատակն է՝
- լրացնել «Հանրային ծառայության մասին» ՀՀ օրենքում պետական հայեցողական պաշտոնների ցանկը և սահմանել Հակակոռուպցիոն կոմիտեում հայեցողական պաշտոն զբաղեցնող անձանց պաշտոնային դրույքաչափերի հաշվարկման գործակիցները,
- լուծել Կոմիտեի ծառայողների և Հատուկ Քննչական Ծառայության ինքնավար պաշտոն զբաղեցրած անձանց երկարամյա ծառայության կենսաթոշակից օգտվելու իրավունքի իրացմանը խոչընդոտող խնդիրները, նպաստելով վերջիններիս սոցիալական որոշ երաշխիքների ապահովման բարելավմանը,
- խուսափել առաջիկայում սպասվելիք աննախադեպ գերծանրաբեռնվածությամբ պայմանավորված քննության որակին սպառնացող խոչընդոտներից՝ ավելացնելով հակակոռուպցիոն Կոմիտեում ինքնավար թափուր պաշտոնը ժամանակավորապես զբաղեցնող անձանց քանակը։
2021 թ. հոկտեմբերի 22-ին Հակակոռուպցիոն կոմիտեում երեսուն ինքնավար թափուր պաշտոնների համալրման կապակցությամբ, համաձայն «Հակակոռուպցիոն կոմիտեի մասին» օրենքի 48-րդ հոդվածի 2-րդ մասի, 2021 թ. հոկտեմբերի 23-ից «Հակակոռուպցիոն կոմիտեի մասին» օրենքն ու դրա հետ փոխկապակցված ակտերը ամբողջությամբ ուժի մեջ են մտնում:
