2022թ–ից նույնականացման քարտ չունեցող ՀՀ քաղաքացիները հին նմուշի` ոչ կենսաչափական տվյալներով անձնագրեր կստանան 2 տարի վավերականության ժամկետով` ներկայիս 10 տարվա փոխարեն։ Նույնականացման քարտերի տրամադրման կարգը կմնա անփոփոխ` 10 տարի ժամկետով։
Այս մասին այսօր ՀՀ կառավարության նիստում հայտարարեց ՀՀ ոստիկանության պետի տեղակալ Արա Ֆիդանյանը` ներկայացնելով կառավարության 1998թ–ի որոշման մեջ առաջարկվող փոփոխությունները։
«Տվյալ որոշման փոփոխության նպատակն է խթանել նույնականացման քարտերի տրամադրման գործընթացը, ինչպես նաև ոչ կենսաչափական տվյալներ պարունակող անձնագրերը հնարավորինս կարճ ժամանակահատվածում հանել շրջանառությունից»,– ասաց Ֆիդանյանը։
Փոխոստիկանապետը նաև հայտնեց, որ արդեն մշակվել է նոր կենսաչափական անձնագրերի ներդրման համակարգը, որն իրենից ներկայացնելու է առավել լայն տեղեկատվական համակարգ։ Նոր էլեկտրոնային անձնագրերով ՀՀ քաղաքացիները նույնականացվելու են ոչ միայն պետական ծառայությունների, այև ՀՀ ողջ տնտեսական համակարգում։
Մեկնաբանելով ՀՀ կառավարության նոր որոշումը` ՀՀ վարչապետ Նիկոլ Փաշինյանն այն որակեց որպես «հերթական ոչ պոպուլյար որոշում», որն իրականացվում է ՀՀ տեխնոլոգիական առաջընթացն ապահովելու նպատակով։
«Այսօր Հայաստանը տեխնոլոգիական առումով հետ մնացած երկիր է, որովհետև այն անձնագրերը, որ ՀՀ քաղաքացիներն այսօր օգտագործում են, ժամանակակից աշխարհում արդեն շատ վաղուց չեն օգտագործվում»,–ասաց Փաշինյանը։
Բացի այդ, նրա խոսքով, ՀՀ–ում այսօր 3-4 անձը հաստատող փաստաթուղթ է գործում, ինչն ազդում է ոչ միայն քաղաքացիներին մատուցվող ծառայությունների որակի, այլև ընտրական գործընթացի վրա։
