Վարդենիս քաղաքի ավագանու ընդդիմադիր ներկայացուցիչները նիստ գումարեցին և 14 կողմ ձայնով քաղաքապետ ընտրեցին «Ահարոն Խաչատրյան» դաշինքի առաջնորդ և թեկնածու Ահարոն Խաչատրյանին:
«Քաղաքացիական պայմանագիր» կուսակցության անդամները ներկա չէին նիստին։ ՔՊ անդամներից Նաիրա Մանուչարյանը հայտարարեց` իրենց ոչ ոք չի զգուշացրել, որ նիստն ի վերջո պետք է կայանա։
Նրա խոսքով՝ այսօրվա նիստը հետաձգվել էր մինչև հունվարի 3-ը, ինչի պատճառով իրենք չեն մասնակցել դրան։ Հաջորդ նիստը տեղի կունենա 2022 թվականի փետրվարի 8-ին։
Հիշեցնենք, որ Վարդենիսի ավագանու անդրանիկ նիստը նշանակվել էր դեկտեմբերի 30-ին։ Նիստի մեկնարկից առաջ Վարդենիսի քաղաքապետի պաշտոնակատար Արամ Մելքոնյանի և «Ահարոն Խաչատրյան» դաշինքի անդամ Կարեն Մկրտչյանի միջև վիճաբանություն էր եղել:
Մելքոնյանը պահանջել էր, որ Մկրտչյանը լքի շենքը՝ նրան մեղադրելով հակաօրինական գործողությունների մեջ։
Վեճին միջամտել էին ոստիկանները, որոնք բերման էին ենթարկել ավագանու 2 ներկայացուցչի։ Այսպիսով, խորհրդի առաջին նիստը տապալվել էր։
