ՀՀ ԱԺ պաշտպանության եւ անվտանգության հարցերի մշտական հանձնաժողովի արտահերթ նիստն այսօր դարձյալ չկայացավ։ Օրակարգի միակ հարցը` հանձնաժողովի նախագահի տեղակալի ընտրությունը չկայացավ` թեկնածու չլինելու պատճառով։«Քանի որ իշխող խմբակցությանն է անցել թեկնածուի հարցը, իշխող խմբակցությունն էլ թեկնածու չի առաջադրել, նշանակում է՝ օրակարգւմ մենք հարց չունենք։ Նիստը համարում եմ փակված»,– հայտարարեց հանձնաժողովի նախագահ Անդրանիկ Քոչարյանը։
Ու թեև հանձնաժողովի նախորդ նիստում Քոչարյանն ասել էր, որ «Քաղաքացիական պայմանագիրը» պատրաստվում է հանձնաժողովի նախագահի տեղակալի պաշտոնում իր թեկնածուին առաջադրել, բայց այսօր էլ հայտարարեց, որ հարցը կստանա իր իրավական լուծումը։ «Իսկ մինչ իրավական լուծումը մեր իրավաբանները մեզ կհուշեն, թե մինչ այդ ինչ իրավակարգավորմամբ այս ձևական մասը մենք կանցնենք»,– ասաց նա։
Նշենք, որ հանձնաժողովի նիստին ընդդիմադիր պատգամավորները դարձյալ չէին ներկայացել։ Հիշեցնենք` ԱԺ պաշտպանության և անվտանգության հարցերի հանձնաժողովի փոխնախագահի պաշտոնում «Հայաստան» խմբակցությունը 14 անգամ առաջադրել էր Արթուր Ղազինյանի թեկնածությունը, իսկ ԱԺ մեծամասնությունը 14 անգամ մերժել էր նրան։
Դեկտեմբերի 7-ի նիստում «Հայաստանն» այլևս որևէ թեկնածու չառաջադրեց` այդ կերպ արտահայտելով իր վերաբերմունքը իրենց թեկնածուին 14 անգամ մերժած իշխանական ուժի նկատմամբ։Ընդդիմությունը կարող է կորցնել ԱԺ պաշտպանության եւ անվտանգության հարցերի մշտական հանձնաժողովի նախագահի տեղակալի պաշտոնը, եթե շարունակի թեկնածու չառաջադրել։
Հանձնաժողովի նախագահ Անդրանիկ Քոչարյանը, վկայակոչելով ԱԺ Կանոնակարգ օրենքի 138 հոդվածը, հայտարարել էր, որ հանձնաժողովի նախագահի տեղակալի պաշտոնում թեկնածու չառաջադրելու դեպքում այդ իրավասությունն անցնում է ամենամեծ գործակիցն ունեցող քաղաքական ուժին, այսինքն` «Քաղաքացիական պայմանագրին»։
Դեկտեմբերի 21-ի նիստում Քոչարյանը զգուշացրել էր, որ եթե հաջորդ նիստին էլ ընդդիմությունն իր այդ իրավունքը չիրացնի, ՔՊ–ն արդեն իր թեկնածուին կներկայացնի։ԱԺ ընդդիմադիր «Պատիվ ունեմ» և «Հայաստան» խմբակցությունները համատեղ հայտարարություն էին տարածել, որտեղ Անդրանիկ Քոչարյանի դիրքորոշումը որակել էին որպես հանձնաժողովի նախագահի տեղակալի պաշտոնը զավթելու անթաքույց փորձ։
