ՀՀ արդարադատության նախարար Կարեն Անդրեասյանն այսօր լրագրողների հետ զրույցում հայտնեց, որ նախարարությունը չի հրաժարվել գլխավոր դատախազի և տեղակալների աշխատավարձը բարձրացնելու նախագծից։ Ըստ նրա՝ քննարկումներ են ընթանում, թե որքան պետք է բարձրանան աշխատավարձերը։
«Պետք է ձևավորվի ճիշտ համամասնություն։ Թե կոնկրետ ումը որքան կբարձրանա, դեռ քննարկվում է»,- ասաց Անդրեասյանը։
Դիտարկմանը՝ ինքը «Քաղաքացիական պայմանագիր» կուսակցությանն անդամագրվելու հայտ էր ներկայացրել, հարցին՝ ընդունվե՞լ է իր հայտը, Անդրեասյանն ասաց՝ դեռ ոչ։
Դիտարկմանը, որ ինքը քաղաքական թիմի անդամ է, հարցին՝ Նիկոլ Փաշինյանի ամանորյա ուղերձում ինչո՞ւ գերիների վերադարձի մասին անդրադարձ չկար, Կարեն Անդրեասյանը նկատեց՝ ճիշտ կլինի այդ հարցով դիմել վարչապետի աշխատակազմին։
«Սա քաղաքական թիմի պատասխանելու հարցը չէ։ Ելույթն ուներ կարևոր բազմաթիվ մեսիջներ, տոնական շնորհավորանք էր։ Պետք է կենտրոնանալ բոլոր այն կետերին և սպասումներին, որը վարչապետն առաջարկեց։ Բոլորս էլ, նաև վարչապետը, աշխատում ենք գերիների վերադարձի մասով, մեր միջազգային այցերին այդ հարցը բարձրաձայնում ենք»։
Լրագրողներն Անդրեասյանից հետաքրքրվեցին նաև, թե ինչպե՞ս է գնահատում ՄԻՊ Արման Թաթոյանի աշխատանքը, քանի որ ինքն էլ է նախկինում եղել այդ պաշտոնին, նախարարն ասաց՝ գործող ՄԻՊ-ին գնահատական չի կարող տալ։
«Ինչ վերաբերում է Քրիստինե Գրիգորյանի թեկնածությանը, ապա ես նրան աջակցում եմ։ Գրիգորյանն արժանի թեկնածու է, նա անցել է այնպիսի ճանապարհ, որ կկարողանա բոլորիդ գոհացնել՝ որպես ՄԻՊ։ Գործող ՄԻՊ-ի աշխատանքին գնահատական չեմ տալիս՝ պահելով էթիկայի նորմերը»։
Խոսելով սահմանադրական բարեփոխումներն իրականացնող խորհուրդ ստեղծելու մասին՝ արդարադատության նախարարը հայտնեց՝ առաջիկա տասնօրյակում հայտնի կլինի կազմը։
«Կազմում կլինեն խորհրդարանական ընդդիմության և իշխանության, հասարակական մի քանի կազմակերպության, արտախորհրդարանական ուժերի ներկայացուցիչներ։ Մենք բոլորս միասին կխոսենք և կհասկանաք, թե ինչ հայեցողական մոտեցումներ են լինելու հանձնաժողովում»,- ասաց Անդրեասյանը։
