Այսօր` հունվարի 7-ին, ՀԱՊԿ գլխավոր քարտուղար Ստանիսլավ Զասը հեռախոսազրույց է ունեցել Ղրղզստանի Հանրապետության նախագահ Սադիր Ժապարովի հետ։
Ինչպես հայտնում է ՌԻԱ Նովոստին, վկայակոչելով ՀԱՊԿ քարտուղարությունից ստացված տեղեկությունները, հեռախոսազրույցի ընթացքում քննարկվել է Ղազախստանում տիրող իրավիճակը։Ղրղզստանի խորհրդարանը համաձայնություն է տվել միանալու Ղազախստանում ՀԱՊԿ-ի խաղաղապահ ուժերի առաքելությանը։
Ղրղզստանի փոխվարչապետ Կամչիբեկ Տաշիևը խորհրդարանի նիստում ասել է, որ Ղրղզստանը Ղազախստան կուղարկի 150 խաղաղապահ և 19 միավոր զինտեխնիկա։Նշենք, որ ՀԱՊԿ խաղաղապահների տեղաբաշխումը Ղազախստանում նախատեսված է ավարտել այսօր` հունվարի 7-ին։
Խաղաղապահները, պաշտոնական հայտարարության համաձայն, ռազմական գործողություններին չեն մասնակցելու, նրանց առաքելությունը բացառապես պաշտպանական է։ Ինչպես հայտնել էր Ղազախստանի նախագահի աշխատակազմը` այդ երկրում ՀԱՊԿ խաղաղապահ ուժերի հիմնական խնդիրներն են պետական և ռազմական կարևոր օբյեկտների պաշտպանությունը, Ղազախստանի Հանրապետության իրավապահ ուժերին իրավիճակի կայունացման հարցում աջակցությունը։
