Ռազմիկ Դավոյանի ստեղծած գրականությունն ինքնատիպ ճանապարհ է դեպի մարդն ու մարդկայինը: Անվանի բանաստեղծի մահվան կապակցությամբ հղած ցավակցական հեռագրում այս մասին ասել է ՀՀ նախագահ Արմեն Սարգսյանը, տեղեկանում ենք նախագահի աշխատակազմից։
Հայտնել էինք, որ այսօր կյանքից հեռացել է Ռազմիկ Դավոյանը։
«Խոր ցավ եմ ապրում՝ իմ բազմաթիվ հայրենակիցների հետ միասին սգալով մեր նորագույն գրականության լավագույն ներկայացուցիչներից մեկի՝ բանաստեղծ, հասարակական գործիչ Ռազմիկ Դավոյանի կորուստը։ Ռազմիկ Դավոյանի ստեղծած գրականությունն ինքնատիպ ճանապարհ է դեպի մարդն ու մարդկայինը՝ ի սկզբանե համահունչ լինելով ժամանակին և իրականությանը»,–ասված է նախագահի հեռագրում։
Սարգսյանը նշել է, որ ավելի քան վեց տասնամյակ Դավոյանի յուրահատուկ ու բազմաշերտ ստեղծագործությունը որպես պոեզիա ու արձակ, որպես երգի վերածված բանաստեղծություն ու հրապարակախոսություն, որպես մարդկային զգացմունք և քաղաքացիական մտահոգություն ուղեկցում է մեզ։
Այն, ըստ նախագահի, շարունակելու է այդպիսին մնալ նաև հետագա ժամանակներում, քանզի Ռազմիկ Դավոյանը ստեղծագործ անհատ էր ու հայրենիքի ճակատագրով ապրող քաղաքացի։
