Ոստիկանության մոտ 1000 աշխատակից է վիրավորվել Ալմաթիում հունվարի սկզբին տեղի ունեցած անկարգությունների ժամանակ, հայտարարել է Ղազախստանի նախագահ Կասիմ-Ժոմարտ Տոկաևը։
Հունվարի 12-ին նա այցելել է Ալմաթի, որտեղ մասնակցել է օպերատիվ շտաբի նիստին, հանդիպել զոհված ոստիկանների ու զինվորականների ընտանիքների հետ։
«Միայն այս քաղաքում, եթե խոսենք ոստիկանների մասին, ինչպես ինձ ասացին, գրեթե 1000 մարդ վիրավորում է ստացել»,- հայտարարել է նախագահը, ում ելույթը հեռարձակում էր «Խաբար 24» հեռուստաընկերությունը։
Հիշեցնենք` Ղազախստանում բողոքի զանգվածային ցույցեր էին սկսվել 2022 թվականի հունվարի առաջին օրերին։ Հունվարի 4–ին և 5-ին Ալմաթիում բախումներ էին տեղի ունեցել ցուցարարների և ուժայինների միջև։
