Արցախյան 44–օրյա պատերազմի ընթացքում ՀՀ աշխատանքի և սոցիալական հարցերի նախարարությունը «Հայաստան» համահայկական հիմնադրամի հետ բյուջետային հարաբերությունների մեջ չի մտել և չի ստացել ուղիղ ֆինանսավորում։ Նման հայտարարություն արեց նախկին սոցապնախարար, «Ապրելու երկիր» կուսակցության ներկայացուցիչ Մեսրոպ Առաքելյանը` «Հայաստան» համահայկական հիմնադրամի կողմից հավաքագրված և ՀՀ պետական բյուջե փոխանցված միջոցների օգտագործումն ուսումնասիրող քննիչ հանձնաժողովի նիստին։
«ՀՀ աշխատանքի և սոցիալական հարցերի նախարարության կողմից պատերազմի հետևանքով իրականացված սոցիալական ծրագրերի բյուջետային գործընթացը տեղի է ունեցել բացառապես մեր նախարարության տիրույթում»,–ասել է Առաքելյանը։
Նրա խոսքով` այն բոլոր ծրագրերը, որոնք իրականացվել են ՀՀ աշխատանքի և սոցիալական արցերի նախարարության կողմից տեղի են ունեցել ներքին վերաբաշխումների կամ պահուստային ֆոնդի միջոցով։
Հիշեցնենք, 2020 թվականին 44-օրյա պատերազմի օրերին «Հայաստան» համահայկական հիմնադրամը» նախաձեռնեց «Մենք ենք, մեր սահմանները, ամեն ինչ «Արցախի համար» դրամահավաքը։ Հետո պարզվեց, որ հավաքագրված գումարից մի զգալի մաս՝ 52 մլրդ 703 մլն դրամը փոխանցվել է կառավարությանը։
