Ղազախստանում խաղաղապահների վրա հարձակումներ չեն եղել, լուրջ բախումների հնարավորությունները խափանվել են։ Նման հայտարարություն է արել ՀԱՊԿ գլխավոր քարտուղար Ստանիսլավ Զասը, տեղեկանում ենք ՌԻԱ Նովոստիից։Նրա խոսքով` Ղազախստանում իրավիճակը շտկվում է, սակայն երկրի ղեկավարությունը դեռ շատ անելիքներ ունի։Զասը հայտնել է նաև, որ անկարգությունների ժամանակ ձերբակալվածների թվում կան օտարերկրացիներ։ Սակայն, ըստ նրա, նրանք մեծ թիվ չեն կազմում։
«Խոսել այն մասին, որ հիմա իրավիճակը կարգավորվել է, այնքան էլ ճիշտ չի լինի։ Ղազախստանի միայն 5 շրջաններում է արտակարգ դրությունը չեղարկվել, իսկ մյուսներում այն պահպանվում է։ Սակայն այս ամենով հանդերձ, իրավիճակը շտկվում է, և կարող ենք ասել, որ կյանքի բնականոն հունին են վերադառնում»,–ասել է Զասը։
Նրա խոսքով` տեղի ունեցածը անսպասելի էր ոչ միայն այլ երկրների, այլ նաև հենց ղազախների համար։«Այնտեղ գործում էին ոչ միայն քրեական բնույթի խմբեր՝ ավազակներ, կողոպտիչներ, այլև կային նաև կազմակերպված խմբեր, որոնք զինված էին և այլ նպատակներ էին հետապնդում, կարելի է ասել ՝ ահաբեկչական նպատակներ»,–նշել է Զասը` հավելելով, որ հատկապես ներքին գործերի նախարարության և այլոց շենքերի գրոհի ժամանակ լավ կազմակերպված և ակնհայտորեն պատրաստված խմբեր են գործել։
Նրա խոսքով՝ հարձակումներ են եղել, որոնց մասնակիցները տարբերանշաններ են ունեցել, իսկ նրանց գործողությունները եղել են պրոֆեսիոնալ։ Այսինքն, ըստ Զասի, ինչպես հնչել է Ղազախստանի նախագահի գնահատականներում, կարող ենք խոսել այն մասին, որ ահաբեկչական խմբեր են գործել:
