Այսօր ութերորդ գումարման Ազգային ժողովում երկու պատգամավորներ երդմամբ ստանձնեցին պատգամավորական մանդատները:
ԱԺ փոխնախագահ Հակոբ Արշակյանը տեղեկացրեց, որ ԿԸՀ-ն ներկայացրել է ԱԺ պատգամավոր ընտրված և լիազորությունները վաղաժամկետ դադարած պատգամավորների մանդատները հաջորդ թեկնածուներին տրամադրելու մասին արձանագրությունները, ըստ որոնց մանդատները տրվում են «Քաղաքացիական պայմանագիր» կուսակցության ընտրական ցուցակի առաջին մասի հաջորդ թեկնածուներ Լիլիթ Կիրակոսյանին և Էդգար Հակոբյանին:
Նրանք երդմամբ ստանձնեցին իրենց մանդատները:
Նշենք, որ նորանշանակ պատգամավորները փոխարինում են մարզպետներ նշանակված նախկին պատգամավորներ Սերգեյ Մովսիսյանին և Սեդրակ Թևոնյանին:
ՀՀ կառավարության որոշմամբ հունվարի 13–ին Սերգեյ Մովսիսյանը նշանակվել է ՀՀ Արագածոտնի, իսկ Սեդրակ Թևոնյանը` Արարատի մարզպետ։
