ՀՀ պաշտպանության նախկին նախարար Դավիթ Տոնոյանը պահանջելու է, որ իր դեմ հարուցված քրեական գործը քննվի դռնբաց դատական նիստերով։ Այս մասին հայտարարություն է տարածել Տոնոյանի փաստաբանական խումբը։Հայտարարության մեջ նշվում է, որ այդ պահանջը միտված է քրեական գործի հրապարակային քննություն ապահովելուն:
«Մատակարարված հրթիռների քանակի ձեռքբերման գինը, դրանց տեսակը, մատակարարման ժամանակահատվածը և գործի այլ հանգամանքները նախաքննական մարմնի և դատախազության հաղորդագրություններով, հրապարակումներով արդեն իսկ բացահայտված լինելու պայմաններում այլևս խոսք չի կարող լինել որևէ պետական անվտանգության, գաղտնիքի կամ դռնփակ դատական նիստ անցակցնելու մասին:
Ուստի մեր համոզմամբ, դռնփակ նիստերի անցկացմամբ փորձ է արվելու չբացահայտել քրեական գործում ապացույցների բացակայությունը և մեղադրող կողմի հիմնավորումների սին լինելը»–ասվում է հայտարարության մեջ:
Փաստաբանական խումբը շեշտում է նաև այն հանգամանքը, որ ՀՀ ազգային անվտանգության ծառայությունը և տարբեր շրջանակներ հիշյալ քրեական գործը փորձել են կապել 44-օրյա պատերազմի հետ, ուստի Դավիթ Տոնոյանը անհրաժեշտ է համարում, որ քրեական գործի հրապարակային քննությամբ պարզվի և հերքվի նաև այդ հանգամանքը։
