Ռուսաստանը, Իրանն ու Չինաստանը համատեղ ռազմածովային զորավարժություններ կանցկացնեն։ Տեղեկությունը հայտնում է ՌԻԱ Նովոստին՝ հղում անելով Խաղաղօվկիանոսյան նավատորմի մամուլի ծառայությանը։ Նշվում է, որ Խաղաղօվկիանոսյան նավատորմի նավերի ջոկատն արդեն Իրանի Չաբահար նավահանգստում է։
Ռուսաստանի ռազմածովային նավատորմի պաշտոնական պատվիրակությունը կմասնակցի Ռուսաստանի, Իրանի և Չինաստանի ռազմանավերի համատեղ ռազմածովային զորավարժության անցկացմանը նվիրված խորհրդաժողովին:
Բացի այդ, ռուսական նավերը կհամալրեն պարենի, ջրի և վառելիքի պաշարները:Խաղաղօվկիանոսյան նավատորմի նավերի ջոկատը Վլադիվոստոկից դուրս է եկել 2022 թվականի մեկնարկից մի քանի օր առաջ։
Նախատեսվում է, որ առաջադրանքների իրականացման ժամանակահատվածում նավերը կմեկնեն մի շարք պետությունների նավահանգիստներ:
Ավելի վաղ Թեհրանում ՌԴ դեսպան Լևան Ճաղարյանը հայտարարել էր, որ Ռուսաստանը, Իրանն ու Չինաստանը համատեղ «Chiru» ծովային զորավարժություններ կանցկացնեն Պարսից ծոցի շրջանում 2021–ի վերջին և 2022-ի սկզբին:
Նրա խոսքով՝ զորավարժությունների հիմնական խնդիրը միջազգային նավագնացության անվտանգության ապահովման և ծովահենների դեմ պայքարի գործողությունների մշակումն է:
