Արդեն շուրջ 6 ամիս Հայաստանում գործում է պարեկային ոստիկանությունը, որի շուրջ բավական դրական մթնոլորտ է ստեղծվել: Այսօր ՀՀ կառավարության հերթական նիստում հայտարարեց ՀՀ վարչապետ Նիկոլ Փաշինյանը՝ ներկայացնելով ծառայության 6-ամսյա գործունեության արդյունքները:
«Տրանսպորտային միջոցը ոչ սթափ վարելու համար կազմված արձանագրություններ. նախորդ համեմատելի ժամանակահատվածում այսպիսի 565 արձանագրություն է կազմվել, պարեկային ոստիկանության կողմից՝ 1917: Աճը՝ 3.5 անգամ: Հաշվառման համարանիշի հետ կապված արձանագրություններ, այսինքն, որ սխալ համարներով կամ առանց համարի են երթևեկել. նախկինում ՃՈ կողմից կազմվել է 953 արձանագրություն, պարեկային ոստիկանության կողմից՝ 3435, աճը՝ 3.5 անգամ»,- ասաց Փաշինյանը:
7 անգամ աճել են ձայնային ազդանշաններով կամ ապօրինի փարոսիկներով երթևեկության խախտումները՝ նախկին 2-ի փոխարեն կազմվել է 15 արձանագրություն: Առանց վարորդական վկայականի վարման արձանագրությունները նախկին 924-ի փոխարեն կազմվել են 4674 դեպքով: Երկրորդ շարքում կայանելու համար կազմված նախկին 1839 արձանագրության փոխարեն պարեկները կազմել են 8716 արձանագրություն: Մայթում կայանելու կամ մայթով երթևեկելու 581 դեպք է արձանագրվել՝ նախկին 60-ի փոխարեն և այլն:
Փաշինյանի նաև հայտնեց, որ եթե նախկինում հանցագործություն կատարելու կասկածանքով ՃՈ-ի կողմից ոչ մի մարդ բերման չէր ենթարկվել, ապա պարեկայինն ոստիկանության աշխատակիցները հուլիս-հունվար ժամանակահատվածում միայն Երևանի տարածքում այդ հիմքով 875 մարդու են բերման ենթարկել: ՃՈ-ը նախկինում երբեք հետախուզվող անձի չի հայտնաբերել, պարեկները նման 51 անձի են հայտնաբերել:
«Մեր դրական արձագանքը նրա մասին չէ, որ մեր քաղաքացիների նկատմամբ այսքան տուգանքներ են կիրառվել, այլ այն մասին, որ ձևավորվել է իրավակարգ, կարգուկանոն, օրենքի նկատմամբ հարգանք ձևավորելու որոշակի ինստիտուտ»,- ասաց Փաշինյանը:
Վարչապետը նաև շեշտեց, որ պարեկային ոստիկանությունն իր գործունեության կարճ ժամանակահատվածում նաև պաշտոնյաների է վարչական պատասխանատվության ենթարկել, այն դեպքում, երբ ՀՀ ողջ պատմության ընթացքում նման ոչ մի դեպք չի եղել:Ընդ որում, ըստ Փաշինյանի, պաշտոնյաների հետ կապված բոլոր դեպքերի բացահայտման համար պարեկները ոստիկանապետի հրամանով արժանացել են խրախուսման:
«Ոստիկանության պետի ընտանիքի անդամի մեքենան տարվել է հատուկ պահպանվող տարածք,- ասաց Փաշինյանը՝ նախապես ներողություն խնդրելով կառավարության նիստին ներկա ոստիկանապետից՝ նրա ընտանիքին վերաբերող այդ դրվագը բացահայտելու համար,- համապատասխան տուգանքը վճարվել է»:
Ոստիկանապետն էլ նշեց, որ պարեկները նաև իրենց կաշառք առաջարկած 4 քաղաքացիների են բերման ենթարկել, հարուցվել են քրեական գործեր: Վերջին դեպքը գրանցվել է երեկ՝ Իսակովի պողոտայում, երբ ոչ սթափ վարորդը պարեկներին գումար է առաջարկել:
