ԱՄՆ-ն հրաժարվել է վիզա տրամադրել ռուսաստանցի տիեզերագնացին

ԱՄՆ իշխանությունները հրաժարվել են վիզա տրամադրել ռուսաստանցի տիեզերագնաց Նիկոլայ Չուբին՝ չբացատրելով պատճառը։ Տեղեկությունը ՌԻԱ Նովոստիին է հայտնել իրազեկ աղբյուրը։

Նշվում է, որ տիեզերագնացը նախատեսում է Միջազգային տիեզերակայան թռչել 2023 թվականի գարնանը:

Գործակալության զրուցակիցը պարզաբանել է, որ միջազգային տիեզերակայան մեկնելուց առաջ արշավախմբի բոլոր ռուս մասնակիցները ավանդաբար պատրաստվում են Ջոնսոնի անվան տիեզերական կենտրոնում:

Նրանք նաև ուսումնասիրում են կայանի ամերիկյան հատվածի սարքը։ Նույն սկզբունքով ԱՄՆ-ի տիեզերագնացներն են պատրաստվում Ռուսաստանում:«Ռոսկոսմոսում» տեղեկությունը չեն մեկնաբանել։

Նիկոլայ Չուբը 2012 թվականին է ընդգրկվել տիեզերագնացների խմբում։ Նա առաջին անգամ պետք է մեկնի տիեզերք: