«Արմեդ» համակարգը, որի միջոցով իրենց պատվաստված լինելը QR կոդի միջոցով փաստում են քաղաքացիները, որևէ անձնական տվյալների գաղտնիություն չի խախտում:
Այս մասին այսօր հրավիրված մամուլի ասուլիսում ասաց առողջապահության նախարար Անահիտ Ավանեսյանը:
Հունվարի 22-ից համաձայն նախարարի հրամանի՝ քաղաքացիները այսուհետ հանրային սննդի և ժամանցի վայրեր կարող են մուտք գործել, ներկայացնելով QR կոդը, եթե պատվաստված կամ թեստավորված են կորոնավիրուսային հիվանդության դեմ: Սակայն, որոշակի քննադատություններ են տարածվում, թե այդպիսով խախտվում է մարդկանց անձնական տվյալների գաղտնիությունը:
«Մեր համակարգը, տվյալների շտեմարանը վերջին տարիներին անընդհատ ուժեղացվում է: Թարմացրել ու ստեղծել ենք հավելյալ սերֆերային պահոց, որը կարևոր էլեմենտ է: «Արմեդ» համակարգի տարածմանը համընթաց նոր սերֆերներ ենք ձեռք բերում՝ ապահովելու մեր քաղաքացիների բժշկական տվյալների պաշտպանված և մեկտեղված լինելու խնդիրը»,- ասաց նա:
Ըստ նրա՝ որևէ անձնական տվյալների գաղտնիություն չի խախտվում, քաղաքացին իր կամքով է ցույց տալիս իր հետազոտության տվյալները: «Մեր հավելվածում այնպես է ձևավորված, որ առաջին էջում փաստում է պատվաստված լինելը, քաղաքացին այդ արդյունքը ցույց տալով կարող է օգտվել որոշակի ծառայություններից: Համավարակը ստեղծել է մի իրավիճակ, երբ որ մենք ստիպված ենք որոշակի սահմնափակումների օգնության դիմել և զսպել վարակի տարածումը»,- նշեց Ավանեսյանը:
Անդրադառնալով այն հարցին, իսկ ինչու մոլեր մուտք գործելիս QR կոդի անհրաժեշտություն չկա, առողջապահության նախարարն ընդգծեց՝ ցանկացած սահմանափակում չի կարող միանշանակորեն ընդունվել, բայց մեր կողմից կիրառված սահմանափակումները շատ կարևոր ազդեցություն են ունեցել համավարակը կառավարելու և պատվաստումները խթանելու և հանրային իմունիտետ ստեղծելու հարցում:
COVID-19-ի տարածումը կանխարգելելու համար հունվարի 22-ից հանրային վայրեր այցելելիս ուժի մեջ են մտել մի շարք սահմանափակումներ։ «Մոլերի, սննդի խանութների և առևտրի կենտրոնների համար այդ սահմանափակումները չեն գործում, որովհետև սկզբունք ենք ընտրել, որ հնարավորինս անհրաժեշտ ծառայությունների համար դեռևս չկիրառել այդ սահմանափակումները: Երբ որ մարդիկ միասին ճաշում են, վարակի տարածման հավանականությունը շատ ավելի մեծ է»,- նշեց նախարարը:
