Քաղցկեղի դեմ բուժման շրջանակներում վիրահատական միջոցների անվճար դառնալուց հետո դիմելիության բավականին մեծ աճ է գրանցվել, ինչը ցույց է տալիս, որ այն հասանելի է դարձել քաղաքացիների համար:
Այս մասին ասաց ՀՀ առողջապահության նախարար Անահիտ Ավանեսյանը:
Նա շեշտեց, որ քաղցկեղը մահացության առումով Հայաստանում զբաղեցնում է երկրորդ տեղը: Վերջին երեք տարիներին ներդրվել են մի շարք ծրագրեր, որոնք կօգնեն քաղցկեղի վաղ հայտնաբերմանը, կանխարգելմանը, այնուհետև բուժումն ավելի արդյունավետ և որակյալ կազմակերպելուն և այդ ծառայությունը ավելի հասանելի դարձնելուն: Եթե նախկինում ֆինանսական պատճառներով մարդիկ հետաձգում էին բուժման գործընթացը, ապա հիմա ունեն դրական և արդյունավետ բուժման ընթացք:
«2021 թվականին մեկնարկել է սքրինինգային ծրագիրը, որի շրջանակներում մինչև օրս հետազոտել ենք 7 հազար կնոջ: Այն պիլոտային ծրագիր է և իրականացվում է երեք մարզերում՝ Սյունիքում, Տավուշում և Լոռիում: Շարունակաբար փորձելու ենք ընդգրկել նաև հաջորդ մարզերը: Նշեմ, որ 7 հազար հետազոտված կանանցից 700-ից ավելիի մոտ հայտնաբերվել են որոշակի խնդիրներ և հավելյալ հետազոտությունների արդյունքում նրանցից մոտ 80-ին որոշակի բժշկական օգնություն է ցուցաբերվել, ինչի արդյունքում վաղ շրջանում մենք կարողացել ենք կանխել դրանց բարդացումը»,-ասաց Անահիտ Ավանեսյանը:
Նախարարի խոսքով՝ կարևոր բաղադրիչ է համարվում դեղորայքային ապահովման ընդլայնումը: 2021 թվականին պատվերի շրջանակներում 195 կին օգտվել է պետական բավական թանկարժեք դեղորայքից, որի ամբողջական կուրսն ընդունելուց հետո հնարավորություն է տալիս առողջացման բավականին լավ ցուցանիշներ գրանցել:
Նա նշեց, որ պետք է ամեն ինչ անեն, որ պացիենտները հնարավորինս շուտ դիմեն բժշկի և ստանան բժշկական օգնությունը այն ժամանակահատվածում, երբ հնարավոր կլինի կանխել հետագա բարդացումները և լիարժեք վերականգնել բնականոն կյանքը:
