ՀՀ երկրորդ նախագահ Ռոբերտ Քոչարյանը չի առաջադրվելու ՀՀ նախագահի պաշտոնում: Այս մասին 5-րդ ալիքին տված հարցազրույցում հայտարարել է ԱԺ «Հայաստան» խմբակցության պատգամավոր Ագնեսա Խամոյանը։
«ԱԺ բրիֆինգների ժամանակ էլ մենք ասացինք, որ այդ հարցով քննարկումներ չենք ունեցել, հետևաբար որոշում էլ չենք կարող ունենալ, բայց լրատվական հնարք է, վերնագրերն այնպես գնացին, թե «Հայաստան» դաշինքը չի բացառում Ռոբերտ Քոչարյանի առաջադրումը նախագահի պաշտոնում: Բայց քանի որ թեման այսպես ուռճացվեց, կարող եմ ասել, որ Ռոբերտ Քոչարյանը չի առաջադրվելու ՀՀ նախագահի պաշտոնում», – ասել է Խամոյանը։
Հիշեցնենք` հունվարի 25-ին խորհրդարանական ճեպազրույցների ժամանակ «Հայաստան» խմբակցության քարտուղար Արծվիկ Մինասյանը հայտնել էր, որ խմբակցությունը ծրագրում է նախագահի իր թեկնածուին առաջադրել:
Հունվարի 23-ին ՀՀ նախագահ Արմեն Սարգսյանը հրաժարական տվեց՝ հայտարարելով, որ չի կարողանում օգտագործել իր ներուժի գերակշիռ մասն ի նպաստ համակարգային ներքին և արտաքին քաղաքական խնդիրների լուծման:
Մեզ կարող եք հետևել նաև Instagram-ում։
