ՆԱՏՕ-ն անվտանգության երաշխիքների վերաբերյալ Ռուսաստանին ուղղված իր պատասխանում հայտարարել է, որ պատրաստ է քննարկել ռազմական գործողությունների ռիսկերի նվազեցման հարցը։ Տեղեկությունը հայտնում է ՌԻԱ Նովոստին՝ հղում անելով dpa գործակալությանը։
«Հնարավոր է քննարկել ռազմական գործողությունների ռիսկերի նվազեցման, թափանցիկության բարձրացման և հաղորդակցության ուղիների կատարելագործման հարցերը»,-ասված է գործակալության հաղորդագրության մեջ:
Նշվում է նաև, որ անվտանգության վերաբերյալ ՌԴ-ի առաջարկներին ՆԱՏՕ-ի ներկայացրած պատասխանը դեռևս չի հրապարակվելու:Հիշեցնենք` 2021 թվականի վերջին Ռուսաստանը ԱՄՆ-ի հետ պայմանագրի և ՆԱՏՕ-ի հետ անվտանգության երաշխիքների մասին համաձայնագրի նախագծեր հրապարակեց։ Մոսկվան մասնավորապես պահանջում էր, որ ՆԱՏՕ-ի ռազմական ուժերը դադարեցնեն ռազմաբազաներ կառուցել հետխորհրդային երկրներում, Ուկրաինային չմիացնեն դաշինքին, հրաժարվեն արևելքի ուղղությամբ հետագա ընդլայնումից:
Ռուսաստանի և ԱՄՆ-ի միջև բանակցություններ կայացան Ժնևում հունվարի 9-ին և 10-ին: Ռուսաստան-ՆԱՏՕ խորհրդի առանձին նիստն անցկացվեց Բրյուսելում հունվարի 12-ին, սակայն այն արդյունք չտվեց։ՌԴ ԱԳ նախարար Սերգեյ Լավրովը Ժնևում Էնթոնի Բլինկենի հետ բանակցություններից հետո ասել էր, որ ամերիկյան կողմը գրավոր կպատասխանի Ռուսաստանի առաջարկներին։ Լավրովը նշել էր, որ ճիշտ կլինի հրապարակել ԱՄՆ-ի պատասխանը։
Մեզ կարող եք հետևել նաև Instagram-ում։
