ՀՀ ԱԳՆ մամուլի քարտուղար Վահան Հունանյանը հերքել է օրեր առաջ մամուլում շրջանառվող լուրերը, որոնց համաձայն՝ իբր ՀՀ արտաքին գործերի նախարարը 29 միլիոն դրամ արժողությամբ կահույքի հավաքածու է գնել:
Վահան Հունանյանը տեղեկացրել է.
«Ապառիկով ապրող Արարատ Միրզոյանը միլիոնատե՞ր է դարձել. ինչ բրենդից է օգտվում ԱԳ նախարարը» վերտառությամբ հոդվածում իբրև տեղեկատվություն ներկայացված սուտը և անճշտություններն ամբողջովին զրպարտություն են, զուրկ տարրական էթիկայից և ոտնահարում են անձնական տվյալների պաշտպանության իրավունքը։
Այսպես՝ Արարատ Միրզոյանը և իր տիկինը «ՉԻ» կայքի՝ «Ապառիկով ապրող Արարատ Միրզոյանը միլիոնատե՞ր է դարձել. ինչ բրենդից է օգտվում ԱԳ նախարարը» վերնագրով հրապարակման մեջ նշված վայրից և նշված կամ դրան մոտ արժեքով կահույքի հավաքածու երբևէ չեն գնել։
Տարակուսանքի տեղիք է տալիս նաև հրապարակման վերնագիրը, որը բացի Արարատ Միրզոյանի պատիվն ու արժանապատվությունը նսեմացնելու մտադրությունից՝ միաժամանակ վիրավորում է նաև վարկային միջոցներից օգտվող մեր համաքաղաքացիներին»:
Մեզ կարող եք հետևել նաև Instagram-ում։
