«Սերժ Սարգսյանն իր հարցազրույցում նշում է, որ Նիկոլ Փաշինյանի՝ վերջին շրջանում ասված թեզերն իրեն հիշեցնում են բանակցային գործընթացի ժամանակ Ալիևի կողմից հնչեցված «փաստարկները»: Հիրավի, Նիկոլ Փաշինյանի վերջին արտահայտությունները բնավ չեն պաշտպանում մեր պետության շահը և վնասում են Արցախի բանակցային գործընթացին: Բայց դա մատնանշող Սերժ Սարգսյանը իր հարցազրույցը ավարտում է՝ նշելով, որ «մենք ջախջախված ենք, մենք կապիտուլացված ենք, բայց կան հնարավորություններ…»:
Ի գիտություն ասեմ, որ հենց նույն Ալիևն է շարունակ պնդում, որ «ջախջախել է մեզ, մեր բանակը, հարկադրել կապիտուլացիա ստորագրել»: Սրանք իսկ և իսկ Ալիևի բառերն են, հիմա հարց՝ եթե Սերժ Սարգսյանը տեսնում է Ալիևի բառամթերքով խոսելու կործանարար հետևանքները, ինչու՞ է նույնն անում: Ինչու՞ է մեր նախկին և ներկա ղեկավարության մոտ ՀՀ պետական շահը շարունակ ստորադասվում իրար մեղադրելու և սեփական քաղաքականությունն արդարացնելու անհագ ձգտմանը:
Ուղղակի հրաժարվեք Ալիևի բառամթերքից և սպասարկեք ՀՀ–ի և Արցախի անվտանգային շահը, փորձեք ստորադասել փոխադարձ ատելությունը և մի վնասեք Հայաստանի Հանրապետության ապագային: Մենք ոչ կապիտուլացված ենք, ոչ էլ ջախջախված, մենք ռազմական անհաջողություն ենք կրել, իսկ այժմ պետք է ելքեր և լուծումներ փնտրենք մեր պետությունն ու անվտանգությունը պաշտպանելու համար»,- գրել է ադրբեջանագետ Տաթևիկ Հայրապետյանը։
Մեզ կարող եք հետևել նաև Instagram-ում։
