Հայաստանում ՌԴ արտակարգ և լիազոր դեսպան Սերգեյ Կոպիրկինն աշխատանքային այցով Շիրակի մարզում էր, որտեղ պատրաստվում են նշել հայ-ռուսական դիվանագիտական հարաբերությունների հաստատման 30–ամյակը։Ապրիլին կմեկնարկեն հոբելյանական միջոցառումները. մի շարք միջոցառումներ էլ նախատեսվում է անցկացնել հենց Շիրակի մարզում:
Շիրակի մարզպետ Նազելի Բաղդասարյանը կազմակերպչական աշխատանքներից որոշ մանրամասներ ներկայացրեց դեսպանին: «Նախատեսում ենք, որ կլինեն Ռուսական օրեր, որոնց ընթացքում Ռուսական ռազմաբազայում կհայտարարվի բաց դռների օր: Իմ հանձնարարականով մարզի համայնքների մշակութային հաստատություններում կանցկացվեն ռուսական ծրագրեր, թանգարաններում կանցկացվեն ռուսալեզու էքսկուրսիաներ»,-նշեց մարզպետը՝ տեղեկացնելով, որ քննարկումներ են տարվում նաև Գյումրու Վ.Աճեմյանի անվան դրամատիկական թատրոնի հետ՝ ռուս հանդիսատեսի համար ներկայացում ունենալու շուրջ:
Հոբելյանական տարվա շրջանակներում Գյումրու քաղաքապետ Վարդգես Սամսոնյանը ցանկություն է հայտնել Գյումրիում բացել հայ-ռուսական հարաբերությունների պուրակ: «Առաջիկայում էլ պետական միջոցներով Արթիկ քաղաքում կվերակառուցենք Գագարինի պուրակը: Այլ միջոցառումներ ևս նախատեսված են: Չեմ թաքցնում՝ շատ «մարտական» եմ տրամադրված հայ-ռուսական հարաբերությունների սերտացմանը և, կարծում եմ, որ մենք ավելի տեսանելի պետք է դարձնենք համագործակցության շրջանակը, որ ունեցել ենք նախկինում»,- նշեց Բաղդասարյանը:
Հանդիպման ընթացքում անդրադարձ եղավ երկու երկրների հարաբերություններին ու այդ հարաբերությունների էլ ավելի սերտացմանը: «Հատկապես Գյումրին կարևոր քաղաք է հայ-ռուսական հարաբերությունների առումով՝ ռուսական ռազմաբազայի, սահմանապահ ջոկատի, գլխավոր հյուպատոսության, Ռուսական Տան առկայությունն արդեն իսկ խոսում է այդ հարաբերությունների ջերմության մասին: Գյումրիում վերջերս նաև բացվել է ռուսաց լեզվի կրթական կենտրոն, գործում է ռուսական տեղեկատվական կենտրոնը: Լավ հարաբերություններ կան նաև «Շիրակի» պետական համալսարանի հետ»,-նշեց Հայաստանում ՌԴ դեսպան Սերգեյ Կոպիրկինը: Նրա խոսքով` մարզային ու քաղաքային իշխանությունների հետ միշտ էլ ջերմ հարաբերություններ եղել են ու ինքն ուրախ է, որ այդ հարաբերություններն այդպես էլ շարունակվում են:
Մարզպետը կարևորեց այս ընթացքում գերիների վերադարձի հարցում ռուսական կողմի ու ընդհանուր առմամբ ռուս խաղաղապահների կատարած աշխատանքը: Այս ընթացքում Շիրակի մարզի 29 քաղաքացի, ռուսական կողմի աջակցությամբ, արդեն վերադարձել են Հայաստան: Մարզպետը, դեսպանին փոխանցելով այս պահին Ադրբեջանում գտնվող շիրակցի ևս 33 գերիների ծնողների խնդրանքը, հույս հայտնեց, որ առաջիկայում ռուսական կողմը կաջակցի նաև նրանց վերադարձին:Նշենք, որ Հայաստանի Հանրապետության և Ռուսաստանի Դաշնության միջև դիվանագիտական հարաբերությունները հաստատվել են 1992թ. ապրիլի 3-ին:
Աղբյուրը՝ SputnikArmenia
Մեզ կարող եք հետևել նաև Instagram-ում։
