ԱՄՆ պետքարտուղար Էնթոնի Բլինկենն այսօր խոսել է ՌԴ արտգործնախարար Սերգեյ Լավրովի հետ և հայտարարել, որ ԱՄՆ-ն պատրաստ է շարունակել Ռուսաստանի հետ բովանդակային երկխոսությունը անվտանգության ոլորտում փոխադարձ մտահոգությունների թեմայով։ Տեղեկությունը հայտնում է ԱՄՆ արտաքին քաղաքական գերատեսչությունը։Ըստ հաղորդագրության` Բլինկենի ու Լավրովի զրույցը եղել է Ռուսաստանի անվտանգության առաջարկների գրավոր պատասխանի շարունակությունը:
«Պետքարտուղարն ընդգծել է, որ ԱՄՆ պատրաստ է ինչպես երկկողմ ձևաչափով, այնպես էլ դաշնակիցների ու գործընկերների հետ համատեղ շարունակել Ռուսաստանի Դաշնության հետ բովանդակալից կարծիքների փոխանակումը փոխադարձ անվտանգության հարցերի շուրջ»,-հայտնում է Պետդեպարտամենտը:
Զրույցի ընթացքում ԱՄՆ պետքարտուղարը Ռուսաստանին կոչ է արել դիվանագիտական ճանապարհով կարգավորել Ուկրաինայի շուրջ ստեղծված իրավիճակը։Հիշեցնենք` 2021 թվականի վերջին Ռուսաստանը ԱՄՆ-ի հետ պայմանագրի և ՆԱՏՕ-ի հետ անվտանգության երաշխիքների մասին համաձայնագրի նախագծեր հրապարակեց։
Մոսկվան մասնավորապես պահանջում էր, որ ՆԱՏՕ-ի ռազմական ուժերը դադարեցնեն ռազմաբազաներ կառուցել հետխորհրդային երկրներում, Ուկրաինային չմիացնեն դաշինքին, հրաժարվեն արևելքի ուղղությամբ հետագա ընդլայնումից: Ռուսաստանի և ԱՄՆ-ի միջև բանակցություններ կայացան Ժնևում հունվարի 9-ին և 10-ին: Ռուսաստան-ՆԱՏՕ խորհրդի առանձին նիստն անցկացվեց Բրյուսելում հունվարի 12-ին, սակայն այն արդյունք չտվեց։
Մեզ կարող եք հետևել նաև Instagram-ում։
