ՀՀ կառավարության այսօրվա նիստում բավական ուշագրավ մի որոշում է ընդունվել։ Դրանով գործադիրը հաստատել է Էկոնոմիկայի նախարարության մշակած պայմանագրի նախագիծը, որը պետք է ստորագրեն Էկոնոմիկայի նախարարն ու «Մայլեռ Մաունթայն Ռեզորթ» ՓԲԸ տնօրեն տնօրեն Մհեր Բաղդասարյանը։
Պայմանագրով ամրագրվելու են ընկերության խոստացած ներդրումային ծրագրի իրականացման ժամանակացույցը` փուլ առ փուլ, ու նաև դրա չկատարման դեպքում, հնարավոր հետևանքները։
Եթե նախատեսված ժամկետում ընկերությունը իր խոստացած ներդրումների 20 տոկոսից պակաս կատարի, նախարարությունն իրավունք ունի միակողմանիորեն լուծել պայմանագիրը։ Ուշացման դեպքում ժամկետները կարող են երկարաձգվել առավելագույնը 12 ամսով։
Կառավարության նիստում հարցի քննարկման ժամանակ ՀՀ Էկոնոմիկայի նախարարը հայտնեց, որ այսօր Երևանում անցկացված հայ–ավստրիական գործարար համաժողովի ժամանակ «Մայլեռ Մաունթայն Ռեզորթն» ու ճոպանուղիների կառուցման բնագավառում աշխարհում առաջատար Doppelmayr ընկերությունը պայմանագիր են կնքել 24 մլն եվրոյով նոր ճոպանուղու ձեռք բերման վերաբերյալ։
«Ժամանակացույցով մենք ենթադրում ենք, որ 2023-24 սեզոնին ճոպանուղին արդեն կաշխատի։ Բայց թե՛ ներդրողը, թե՛ մենք ամեն ինչ կանենք, որ արդեն հաջորդ տարի լեռնադահուկային ավանը սկսի աշխատել»,– ասաց նախարարը։
Մեզ կարող եք հետևել նաև Instagram-ում։
