«Չարենցավանի գործարանում այժմ կարվում են չստիկներ, խալաթներ եւ սրբիչներ»,- այս մասին այսօր` փետրվարի 3-ին, լրագրողների հետ զրույցում հայտնեց ՀՀ էկոնոմիկայի նախարար Վահան Քերոբյանը: Նախարարը, խոսելով ՀՀ-ում կատարվող ներդրումներից, տեղեկացրեց որ այժմ Չարենցավանում իտալական «Լաբոդենկա» ընկերությունը տեքստիլ արտադրամաս է հիմնել, նշելով, որ «Լաբոդենկան» ամենալյուքս դասի մատակարարներից է:
Քերոբյանի պնդմամբ, հաճախ են հանդիպումներ ունենում եվրոպական ընկերությունների ներկայացուցիչների հետ, որոնք քննարկում են իրենց արտադրանքը Չինաստանից Հայաստան տեղափոխելու հարցը:
Նախարարը նման մոտեցումը համարեց «Կանաչ եւ կայուն» զարգացման ամբողջ աշխարհի օրակարգի մաս. «Ինչպես գիտեք, Չինաստանը աշխարհի արտանետումնրի 30%-ն է տալիս, իսկ Հայաստանը միջին արտանետումների մի շնչին ընկնող 40%-ն է տալիս, այսպիսով, Հայաստանը միջինից ավելի քիչ արտանետումներ ունեցող երկիր է»:
Այս հանգամանքը նախարարը համարեց դրական, քանի որ այդ տեսակետից ընկերությունների համար Հայաստանը լավ միջավայր է. «Այժմ էլ մենք հանդիպում ունենք չորս ընկերությունների հետ, որոնք տարբեր ծրագրեր են ցանկանում ներկայացնել եւ ներդնել Հայաստանում»:
Մեզ կարող եք հետևել նաև Instagram-ում։
