ԱՄՆ նախագահ Ջո Բայդենը կիրակի օրը Իսրայելի վարչապետ Նաֆթալի Բենեթի հետ հեռախոսազրույցում ասել է, որ մտադիր է այս տարեվերջին այցելել Իսրայել։ Այս մասին զրույցից հետո հայտնել է Սպիտակ տան մամուլի ծառայությունը։
«Նախագահը շնորհակալություն է հայտնել վարչապետին Իսրայել այցելելու հրավերի համար և ասել, որ անհամբեր սպասում է այս տարեվերջյան այցին: Նրանք պայմանավորվել են, որ իրենց թիմերը կշարունակեն սերտ խորհրդակցությունները»,- ասվում է հայտարարության մեջ:
Զրույցի ընթացքում երկու երկրների ղեկավարները քննարկել են անվտանգության հարցերը և «մերձավորարևելյան տարածաշրջանի այլ մարտահրավերները», այդ թվում՝ «Իրանի սպառնալիքը»։ «Բայդենը շեշտել է իր հանձնառությունը Մերձավոր Արևելքում կայունության և գործընկերության ամրապնդմանը, ինչի օրինակն է Աբրահամի համաձայնագիրը»,- ասվում է հայտարարության մեջ:
Զրույցի թեմաներից մեկը Սիրիայում ԱՄՆ զինված ուժերի կողմից «Իսլամական պետություն» ահաբեկչական խմբավորման առաջնորդ Աբու Իբրահիմ ալ-Հաշիմի ալ-Կուրեյշիի ոչնչացմանն ուղղված գործողությունն էր։ Ամերիկայի նախագահը նաև հայտարարել է «իր անսասան աջակցությունն է հայտնում Իսրայելի անվտանգությանը և գործողությունների ազատությանը` ընդգծելով ԱՄՆ վարչակազմի լիակատար աջակցությունը Իսրայելի «Iron Dome» ՀՕՊ համակարգի համալրմանը»։
Մեզ կարող եք հետևել նաև Instagram-ում։
