ՀՀ պետական եկամուտների կոմիտեի նախագահ Ռուստամ Բադասյանն ընդունել է ՀՀ-ում Ռուսաստանի արտակարգ և լիազոր դեսպան Սերգեյ Կոպիրկինին։ Տեղեկությունը հայտնում է ՊԵԿ մամուլի ծառայությունը։
«Կողմերն ընդգծել են հարկային և մաքսային վարչարարության ոլորտում 2 երկրների միջև իրավապայմանագրային դաշտի առկայության կարևորությունը։ Սա թույլ է տալիս ակտիվ փոխգործակցել երկկողմ մակարդակում, ինչպես նաև ԱՊՀ գործադիր կոմիտեի, Եվրասիական տնտեսական հանձնաժողովի և այլ միջազգային կազմակերպությունների շրջանակներում»,–նշված է հաղորդագրության մեջ։
Բարձր է գնահատվել Հայաստանում ՌԴ դեսպանատանը մշտական հիմունքներով գործող ՌԴ դաշնային մաքսային ծառայության ներկայացուցչության աշխատանքը: Ընդգծվել է՝ կառույցն անհապաղ արձագանքում է հրատապ լուծում պահանջող հարցերին:
Կողմերը նշել են, որ գոհ են ՊԵԿ–ի և ՀՀ-ում Ռուսաստանի դեսպանության միջև առկա համագործակցության մակարդակից։ Նրանք պատրաստակամություն են հայտնել ընդլայնել 2 երկրների հարկային և մաքսային վարչարարության ոլորտի միջև հետագա համագործակցությունը:ՊԵԿ նախագահը կարևորել է մաքսային լաբորատորիաների ստեղծման ընթացքում ՌԴ փորձի փոխանակման անհրաժեշտությունը՝ մարդկային ներուժի և տեխնիկական հագեցվածության տեսանկյունից:
Մեզ կարող եք հետևել նաև Instagram-ում։
