ՀՀ ժողովրդական արտիստ, օպերային երգչուհի Հասմիկ Պապյանը հանդիպել է ՀՀ կրթության, գիտության, մշակույթի և սպորտի նախարար Վահրամ Դումանյանի հետ, որի ժամանակ խոսել է իր մտահղացումների և առաջիկա ծրագրերի մասին։Տեղեկությունը հայտնում է ՀՀ ԿԳՄՍ նախարարության մամուլի ծառայությունը։
Հասմիկ Պապայանը, որը 32 տարի ապրել է արտերկրում, 2020 թվականին վերադարձել է Հայաստան և ստանձնել Կոնսերվատորիայի օպերային ստուդիայի գեղարվեստական ղեկավարի պարտականությունները։«Սա լավագույնն էր, ինչով կցանկանայի զբաղվել: Սա հնարավորություն է՝ իմ օրինակով ուղղորդելու տեղացի երիտասարդներին, նրանց հասցնելու մեծ բեմեր՝ առավելագույնս օգտագործելով իմ ներուժն ու կարողությունները»,– նշել է Պապյանը:
Նա մատնանշել է երիտասարդների՝ Հայաստանից դուրս ելույթների անհրաժեշտությունը, ինչպես նաև արտերկրում արդեն իսկ կայացած կատարողների փորձի փոխանակումը հայրենակիցների հետ: Պապյանը նաև հայտնել է, որ նախատեսում է մի ծրագիր՝ ներգրավելու հայ արվեստագետներին: Ըստ նրա, տաղանդավոր շատ գործիչներ պատրաստ են վերադառնալ հայրենիք և իրենց փորձը փոխանցել երիտասարդ կատարողներին՝ նրանց մրցունակ դարձնելով նաև եվրոպական թատրոններում:
Վահրամ Դումանյանն էլ ընդգծել է, որ ուրախ է երգչուհուն հայրենիքում տեսնել ու շեշտել է, որ ինքը Պապյանի արվեստի երկրպագուն է։«Շատ բարձր եմ գնահատում ոչ միայն Ձեր մշակութային գործունեությունը, այլև Ձեզ՝ որպես ակտիվ քաղաքացու, որպես մտավորականի, ով անտարբեր չէ օրվա իրադարձությունների և հայրենիքի ճակատագրի նկատմամբ»,- ասել է նախարարը:
«Մեր ունեցած ռեսուրսներով պատրաստ ենք աջակցելու հայրենանվեր ցանկացած գործունեության»,– նշել է ԿԳՄՍ նախարարը:Հանդիպման ընթացքում կողմերը քննարկել են նաև մշակութային դաշտում առկա խնդիրները, դրանց լուծմանն ուղղված հնարավոր ուղիները:
Մեզ կարող եք հետևել նաև Instagram-ում։
