Այսօր՝ փետրվարի 9-ին, ԱԺ-Կառավարություն հարցուպատասխանի ժամանակ ՀՀ ԱԳ նախարար Արարատ Միրզոյանը, պատասխանելով ՔՊ պատգամավոր Վաղարշակ Հակոբյանի՝ Հայաստանի վերաբերյալ Բելառուսի նախագահ Լուկաշենկոյի հայտարարությանն առնչվող հարցին, ասաց. «Ուզում եմ կրկին վերահաստատել, որ Ալեքսանդր Գրիգորևիչի ինքնատիպ աշխարհաքաղաքական վերլուծությունները, մեկնաբանությունները առաջին անգամ չէ, որ արժանանում են միջազգային տարբեր գործընկերների ուշադրությանը, քննարկման առարկա են դառնում տարբեր երկրներում, այդ թվում նաև մեր երկրում»:
Նախարարի խոսքով՝ այդ ձևակերպումներն ուղղված էին սպասարկելու Բելառուսի ներքին քաղաքական օրակարգը. «Վստահ կարող եք լինել՝ ՀՀ արտաքին քաղաքական օրակարգի հետ այն որևէ առնչություն չուներ»:
Նա հաստատեց, որ երեկ ՀՀ-ում Բելառուսի դեսպանը կանչվել է ԱԳՆ. «Դեսպանին են փոխանցվել մեր համոզմունքներն այն մասին, որ մեր հայտարարությունները միմյանց մասին պետք է հիմնված լինեն փոխադարձ հարգանքի վրա, հաշվի առնեն միմյանց շահերն ու սուվերենությունը»:
Արարատ Միրզոյանը հավելեց, որ ՀՀ-ն պատրաստ է շարունակել աջակցել Բելառուսին զանազան միջազգային հարթակներում. «Կարծում եմ՝ լավ կլինի, որ հետայսու հնչող հայտարարությունները համապատասխանեն իրավապայմանագրային, բարեկամական ոգու գնահատականներին և այդ մթնոլորտին»:
Մեզ կարող եք հետևել նաև Instagram-ում։
