Ֆրանսիա այցի շրջանակներում Սփյուռքի գլխավոր հանձնակատար Զարեհ Սինանյանը մասնակցել է «Հայկական շարժում» կազմակերպության տնտեսական ֆորումին։ Տեղեկությունը հայտնում են գլխավոր հանձնակատարի գրասենյակից։
Նշվում է, որ ֆորումին Սինանյանը ներկայացրել է հանձնակատարի գրասենյակի գործունեությունը և Հայաստանի տնտեսական հնարավորությունները, պատասխանել ներկա գործարարների հարցերին։
«Ֆորումի ընթացքում բանախոսները ներկայացրին Հայաստանում ներդրումներ կատարելու հիմնական ոլորտները, արտոնությունները, Հայաստան-Ֆրանսիա տնտեսական համագործակցությանն առնչվող այլ հարցեր»,–նշում են գրասենյակից։
Ֆորումի ավարտին որոշ պայմանավորվածություններ են ձեռք բերվել գործարարների կողմից հայաստանյան շուկայի կարիքների գնահատման համար։
Հիշեցնենք, ՀՀ վարչապետ Նիկոլ Փաշինյանը փետրվարի 8-ից 19-ը ներառյալ Սփյուռքի գործերի գլխավոր հանձնակատար Զարեհ Սինանյանին ու սփյուռքի ներուժի քարտեզագրման և ներգրավման վարչության ներուժի ներգրավման բաժնի պետ Ամալյա Կարապետյանին գործուղել է Ֆրանսիայի Հանրապետություն։
