Փետրվարի 14-ին Ռուսաստանի Դաշնության արտաքին գործերի նախարարի տեղակալ Անդրեյ Ռուդենկոն հեռախոսազրույց է ունեցել Հայաստանի և Թուրքիայի հարաբերությունների կարգավորման հարցերով Հայաստանի հատուկ ներկայացուցիչ, ՀՀ ԱԺ փոխնախագահ Ռուբեն Ռուբինյանի հետ: Տեղեկությունը հայտնում է ՌԴ ԱԳՆ մամուլի ծառայությունը։
«Մտքեր են փոխանակվել հայկական և թուրքական կողմերի միջև մոսկովյան պայմանավորվածությունների (ս. թ. հունվարի 14) իրականացման, ինչպես նաև ս. թ. փետրվարի 24-ին Վիեննայում հատուկ ներկայացուցիչների հերթական շփման կապակցությամբ հետագա քայլերի վերաբերյալ»,–ասվում է ՌԴ ԱԳՆ հաղորդագրության մեջ։
Ռուսական կողմից հաստատվել է Երևանի և Անկարայի միջև շփման եզրեր գտնելուն հետագայում ևս աջակցելու պատրաստակամությունը՝ ի շահ տարածաշրջանում կայունության և կայուն զարգացման:
Հիշեցնենք` Հայաստանի և Թուրքիայի միջև դիվանագիտական հարաբերություններ չկան. 2009 թվականին Ցյուրիխում երկու երկրների արտգործնախարարները դիվանագիտական հարաբերություններ հաստատելու մասին արձանագրություններ ստորագրեցին, բայց այդ փաստաթղթերն այդպես էլ չվավերացվեցին։
Երևանն ու Անկարան 2021 թվականի դեկտեմբերին հայտարարեցին, որ պատրաստ են հարաբերությունների կարգավորմանն ուղղված հստակ քայլեր ձեռնարկել և երկուստեք հատուկ ներկայացուցիչներ նշանակեցին, Անկարան՝ Վաշինգտոնում Թուրքիայի նախկին դեսպան Սերդար Քըլըչին, իսկ Հայաստանը՝ Ազգային ժողովի նախագահի տեղակալ Ռուբեն Ռուբինյանին։
