ԱՄՆ-ն Ուկրաինայում իր դեսպանատունը Կիևից ժամանակավորապես տեղափոխում է Լվով։ Այս մասին, ՌԻԱ Նովոստիի փոխանցմամբ, հայտարարել է ԱՄՆ պետքարտուղար Էնթոնի Բլինկենը:
«Հաշվի առնելով ռուսական ուժերի զգալի աճը (Ուկրաինայի հետ սահմանի մոտ), մենք ժամանակավորապես Կիևից Լվով ենք տեղափոխում Ուկրաինայում մեր դեսպանատունը»,- ասվում է ԱՄՆ-ի պետքարտուղարի հայտարարության մեջ:
Նրա խոսքով՝ դիվանագիտական առաքելությունը կշարունակի կապ պահպանել Ուկրաինայի կառավարության հետ և աջակցել դիվանագիտական ջանքերի համակարգմանը՝ իրադրության ապաէսկալացման համար:
Գերմանական BILD-ը հաղորդում է, որ Պետդեպն ԱՄՆ դեսպանատունը Լվով տեղափոխելու շրջանակներում կարգադրել է ոչնչացնել ցանցային սարքավորումներն ու համակարգիչները, ապամոնտաժել Կիևի առաքելության հեռախոսները։
Ավելի վաղ Վաշինգտոնը թույլ էր տվել իր դիվանագետների մի մասին մեկնումը Ուկրաինայից և ԱՄՆ քաղաքացիներին կոչ էր արել լքել երկիրը։Հիշեցնենք` Ռուսաստանը բազմիցս հերքել է Արևմուտքի և Ուկրաինայի` «ագրեսիվ գործողությունների» վերաբերյալ մեղադրանքները՝ հայտարարելով, որ ոչ մեկին չի սպառնում և ոչ մեկի վրա չի պատրաստվում հարձակվել, իսկ «ՌԴ ագրեսիայի» մասին հայտարարությունները պատրվակ են ռուսական սահմանների մոտ ՆԱՏՕ-ի ավելի շատ ռազմական տեխնիկա տեղակայելու համար։
