Մինսկում ԱՄՆ դեսպանատունը հորդորում է ամերիկացիներին անհապաղ լքել Բելառուսը։ Այս մասին այսօր հայտնում է ՌԻԱ Նովոստիին` հղում անելով ԱՄՆ Պետդեպին։ «Մուտք մի գործեք Բելառուս օրենքների ինքնակամ կիրառման, ձերբակալման վտանգի, Ուկրաինայի հետ Բելառուսի սահմանի ողջ երկայնքով ռուսական ռազմական անսովոր ներկայությունն ընդլայնելու հետ կապված մտահոգության, COVID-19–ի և դրա հետ կապված մուտքի սահմանափակումների պատճառով։ Բելառուսում գտվող ԱՄՆ քաղաքացիները պետք է անհապաղ մեկնեն կոմերցիոն կամ մասնավոր միջոցներով», – ասվում է հաղորդագրության մեջ։
Բացի այդ, Պետդեպը խորհուրդ է տվել մուտք չգործել Մոլդովայի տարածք` հորդորելով ԱՄՆ քաղաքացիներին անհապաղ լքել Մերձդնեստրը։ Ռուսաստանի և Արևմուտքի հարաբերությունները վերջին ամիսներին էլ ավելի են սրվել, վատթարացել է Ուկրաինայի շուրջ տիրող իրավիճակը։
Վաշինգտոնն ու Բրյուսելը մեղադրում են Մոսկվային «ներխուժում» նախապատրաստելու մեջ` հայտարարելով, որ Ռուսաստանը զորք է տեղակայում հարևան պետության հետ սահմանի մոտ։
Այս ֆոնին ՆԱՏՕ–ն ուժեղացնում է ներկայությունը Արևելյան Եվրոպայում՝ այնտեղ լրացուցիչ ուժեր և զորամիավորումներ տեղափոխելով։Մոսկվան հերքում է բոլոր մեղադրանքներն ու հայտարարում, որ դրանք պատրվակ են ռուսական սահմանների մոտ ՆԱՏՕ–ի ռազմական ներկայությունն ուժեղացնելու համար։
