ՀՀ գլխավոր դատախազ Արթուր Դավթյանը վճռաբեկ բողոք է ներկայացրել՝ պահանջելով բեկանել տարիներ առաջ Մարտի 1-ի իրադարձությունների գործով Նիկոլ Փաշինյանի նկատմամբ կայացված մեղադրական դատավճիռը և արդարացնել նրան։
Araratnews.am-ի հետ զրույցում ՀՀ գլխավոր դատախազի խորհրդական Գոռ Աբրահամյանը հաստատեց տեղեկությունը, ասելով, որ ՄԻԵԴ-ի որոշումից հետո ՀՀ գլխավոր դատախազությունը պարտավոր է նախաձեռնել իրավական գործընթաց. «Հիմք ընդունելով ՄԻԵԴ որոշումը՝ Դատախազությունը դիմել է նախկինում Նիկոլ Փաշինյանի վերաբերյալ կայացված դատական ակտերը բեկանելու և իրեն առաջադրված մեղադրանքում արդարացնելու միջնորդությամբ»։
Հիշեցնենք, որ Նիկոլ Փաշինյանը 2008-ի Մարտի 1-ի իրադարձությունների մասով մեղադրվել է մի խումբ անձանց հետ զանգվածային անկարգություններ կազմակերպելու, ոստիկանի նկատմամբ բռնություն գործադրելու համար։ Մեղադրանքի երկրորդ մասով Փաշինյանն արդարացվել է, իսկ զանգվածային անկարգություններ կազմակերպելու համար նա դատապարտվել է ազատազրկման 7 տարի ժամկետով։
