Կորոնավիրուսով վարակվածության ցուցանիշը Հայաստանում նվազման միտում ունի, բայց հիվանդանոցները դեռ ծանրաբեռնված են։ Այսօր կառավարության նիստի ավարտին, լրագրողների հետ ճեպազրույցում հայտնեց ՀՀ առողջապահության նախարար Անահիտ Ավանեսյանը։
«Այո՛, օմիկրոն շտամի պարագայում դեպքերի մեծ մասն ավելի թեթև են ընթանում, բայց սա չի նշանակում, որ մենք չունենք ծանր դեպքեր»,– ասաց նա։
Ավանեսյանը շեշտեց, որ հոսպիտալացված քաղաքացիների 88 տոկոսը պատվաստված չեն ու հիվանդությունը բավական ծանր են տանում։
Առողջապահության նախարարը նշեց, որ համաշխարհային գիտական գնահատականներ կան, որ կորոնավիրուսը կարող է վերածվել սովորական վիրուսային հիվանդության` որոշակի սեզոնային սրացումներով։ Բայց ասել, որ համավարակն ավարտվում է, նրա խոսքով, առայժմ վաղ է։
Նշենք, որ Հայաստանում կորոնավիրուսով վարակվածների թիվը վերջին մեկ օրում ավելացել է 1723-ով, մեկ օրում կորոնավիրուսից մահացել է 24 մարդ։
