Բոլոր զորավարժությունները, որոնք անցկացվում են Ռուսաստանի Դաշնության տարածքում, միանգամայն թափանցիկ են։ Այսօր հայտարարել է ՌԴ նախագահի մամուլի քարտուղար Դմիտրի Պեսկովը՝ պատասխանելով ռուսական զորքերի զորավարժությունների պատճառով լարվածության սրման հնարավորությանը վերաբերող հարցին։ Տեղեկությունը հայտնում է ՌԻԱ Նովոստին։
«Հիմա մի շարք զորավարժություններ են ընթանում, և դրանք բացարձակապես թափանցիկ գործողություններ են, միանգամայն հասկանալի այլ երկրների մասնագետների համար, ուստի դրանք որևէ մեկի չպետք է անհանգստացնեն», – ասել է Պեսկովը։
Ինչ վերաբերում է անվտանգության երաշխիքների վերաբերյալ առաջարկներին, ապա, ՌԴ նախագահի մամուլի քարտուղարի խոսքով, դրանք պետք է ինչ-որ շարունակություն ստանան։ Ինչպես նշել է Պեսկովը, ԱՄՆ-ի հետ շփումներ կլինեն տարբեր մակարդակներում:«Այժմ որոշակի շփումներ կլինեն աշխատանքային մակարդակում, բարձր մակարդակով, ԱԳ նախարարի մակարդակով։ Այդ գաղափարը պետք է ինչ-որ կերպ շարունակություն ունենա։ Տեսնենք` ինչպես դա տեղի կունենա», – նշել է նա։
Պեսկովն ավելացրել է, որ Ռուսաստանի նախագահ Վլադիմիր Պուտինի` ՄԱԿ-ի անվտանգության խորհրդի «հնգյակի» գագաթնաժողով անցկացնելու նախաձեռնությունը առաջվա պես սեղանին է:«Առաջարկվել է այդ հանդիպման ժամանակ քննարկել հիմնական մարտահրավերները։ Այն, ինչի միջով մենք հիմա բոլորս անցնում ենք Եվրոպայում, ուրիշ ի՞նչ է, եթե ոչ հիմնական մարտահրավեր։ Այդ պատճառով այդ թեման պետք է քննարկվի հենց այդպիսի բարձր մակարդակով։ Բայց ինչ վերաբերում է կոնկրետությանը, ապա տեսնենք` ինչ նախաձեռնություններ կլինեն։ Առայժմ ոչ մի կոնկրետություն չկա», – ասել է նա։
