«Ջրվեժ» քաղաքային պարկի» համալիր զարգացման ծրագրի իրականացման արդյունքում մեր քաղաքացիները կունենան ժամանակակից հարմարություններով հագեցած քաղաքային զբոսայգի։2021 թվականին Շրջակա միջավայրի նախարարության «Արգելոցապարկային համալիր» ՊՈԱԿ-ը հայտարարել էր «Ջրվեժ» քաղաքային պարկի» համալիր զարգացման ծրագրի մշակման հայեցակարգի և տարածքի նախագծաէսքիզային փաստաթղթերի կազմման ծառայությունների գնանշման հրավեր։
Այսօր հաղթող ընկերության՝ «Գլոբալ Պրոեկտ» ՍՊԸ-ի ներկայացուցիչները ներկայացրել են «Ջրվեժ» քաղաքային պարկի ապագա կառուցվածքի, արտաքին ձևավորման և մատուցվող ծառայությունների համալիրի նախագիծը։ «Ջրվեժ» քաղաքային պարկի տարածքը նախատեսվում է զարգացնել և բարեկարգել՝ հաղորդելով նոր շունչ տվյալ տարածաշրջանին։
Խորքային և մեծամասշտաբ փոփոխություններ են նախատեսվում ենթակառուցվածքների ստեղծման և մատուցվող ծառայությունների որակի բարելավման ուղղությամբ։ Ճարտարապետական ժամանակակից լուծումները և հորինվածքները հնարավորություն կտան չվնասելով բնությունը և միջավայրը , ինչպես նաև օգտագործելով արդեն իսկ գոյություն ունեցող կառույցները, ստեղծել ժամանցի լավագույն վայր։
Պարկի տարածքում նախատեսվում է կառուցել էկոլոգիապես բնական հումքից մանկական խաղահրապարակներ, սպորտային միջոցառումների կազմակերպման չափանիշներին համապատասխան վազքուղի, ֆուտբոլի, բասկետբոլի և վոլեյբոլի մինի խաղադաշտեր, սքեյթի խաղահրապարակ, Ժամանակակից պահանջներին համապատասխան ավտոկայանատեղի։ Նախատեսված են ձմեռային հանգստի կազմակերպման ենթակառուցվածքներ՝ դահուկային երթուղիներ, սահադաշտ, սահքուղիներ։
«Լինելու են ջերմոցներ, որտեղ տնկվելու ու աճեցվելու են բույսեր, այդ թվում նաև անտառային ծառատեսակներ։Նախատեսված են նաև արվեստի գոտի, դասընթացների կազմակերպման գոտի և թեմատիկ այլ անկյուններ։ Իմ գոհունակությունն եմ հայտնել նախագծի այս փուլում իրականացված աշխատանքների վերաբերյալ, շատ տպավորված եմ աշխատանքի որակից։Պատրաստակամություն եմ հայտնել գործընկերներիս հետ միասին ձեռնամուխ լինել ծրագրի կյանքի կոչմանը, ինչպես նաև խնդրել եմ նույն որակով իրականացանել արդեն նախագծի հաջորդ փուլերը»,- հայտնում է Շրջակա միջավայրի նախարար Հակոբ Սիմիդյանը։
