Թբիլիսիում Թումանյանի ծննդյանը նվիրված միջոցառում է անցկացվել

Թբիլիսիում անցկացվել է տոնական միջոցառում` նվիրված հայ մեծանուն գրող, բանաստեղծ Հովհաննես Թումանյանի ծննդյան 153-ամյակին։ Այս մասին հայտնում է Վրաստանում Հայաստանի դեսպանության մամուլի ծառայությունը։

Միջոցառման շրջանակում վիրահայ համայնքի և Վրաստանում ՀՀ դեսպանության ներկայացուցիչները այցելել են հայ գրողների և հասարակական գործիչների «Խոջիվանք» պանթեոն, ծաղիկներ խոնարհել Թումանյանի շիրմաքարին։

Վիրահայ դպրոցականներն ու Վիրահայոց թեմի նախակրթարանի սաներն էլ արտասանել են Թումանյանի ստեղծագործությունները։

Պանթեոնում անցկացվել է նաև միմյանց գիրք նվիրելու ավանդական միջոցառումը՝ գիրք նվիրելու օրվա կապակցությամբ։