Ֆրանսիայի նախագահ Էմանուել Մակրոնը հեռախոսազրույց է ունեցել Ռուսաստանի Դաշնության նախագահ Վլադիմիր Պուտինի հետ:
Տեղեկությունը հայտնում է Franse Press գործակալությունը ՝ վկայակոչելով Ելիսեյան պալատի հաղորդագրությունը:
«Նախագահ Պուտինի հետ հեռախոսազրույցը տևել է 1 ժամ 45 րոպե»,- հայտնել են Ելիսեյան պալատից:
Նշվում է, որ Պուտինի հետ հեռախոսազրույցից անմիջապես հետո Մակրոնը զանգել է Ուկրաինաւյի նախագահ Վլադիմիր Զելենսկիին:
Զրույցի ընթացքում պետությունների ղեկավարներն աջակցել են եռակողմ կոնտակտային խումբ հրավիրելու և Դոնբասում անհապաղ լռության ռեժիմ մտցնելու անհրաժեշտությանը։
«Ես Էմանուել Մակրոնին տեղեկացրել եմ անվտանգության ներկա իրավիճակի և նոր սադրիչ գնդակոծությունների մասին։ Մենք կողմ ենք խաղաղ գործընթացի ակտիվացմանը։ Մենք աջակցում ենք եռակողմ բանակցային խմբի հրատապ գումարմանը և լռության ռեժիմի անհապաղ ներդրմանը»,- թվիթերի իր էջում գրել է Զելենսկին:
BFM TV հեռուստաալիքի փոխանցմամբ, Զելենսկիի ու Մակրոնի հեռախոսազրույցը տևել է 30 րոպե:
Հիշեցնենք, այս շաբաթ իրավիճակը Դոնբասում լրջորեն սրվել է, որի համար կողմերը փոխադարձաբար միմյանց են մեղադրում: Ռուսական կողմը պնդում է՝ Կիևը անտեսում է նախկինում ձեռք բերված բոլոր պայմանավորվածությունները, բանակի մեծ մասը կենտրոնացրել է Դոնեցկի և Լուգանսկի հետ շփման գծում և պարբերաբար հրետակոծում է, այդ թվում՝ արգելված տեխնիկայի կիրառմամբ։ Ուկրաինական կողմն էլ Ռուսաստանին է մեղադրում բնակավայրերի ուղղությամբ կրակ բացելու ու մինսկյան պայմանավորվածությունները խախտելու մեջ:
Իրավիճակի սրման պատճառով ինքնահռչակ հանրապետությունները սկսել են կանանց, երեխաների և ծերերի տարհանումը Ռոստովի մարզ, ինչպես նաև հայտարարել են ընդհանուր մոբիլիզացիա։
