Երևանում մարտի 1-ից կշահագործվի ևս երկու երթուղի՝ նոր Zhong Tong մակնիշի ավտոբուսներով։ Այս մասին Երևանի քաղաքապետարանում աշխատանքային խորհրդակցության ժամանակ ասաց «Երևանի ավտոբուս» ՓԲԸ տնօրեն Էլբակ Թարփոշյանը։
Նրա խոսքով՝ նոր ավտոբուսները կսպասարկեն այն երթուղիները, որտեղ «Գազելներն» այլևս շահագործման ենթակա չեն, և մարտի 1-ին այդ գծերը փակվելու են։ Քաղաքապետի հարցին, թե արդյոք գործընթացն առաջիկայում կշարունակվի, Թարփոշյանը պատասխանեց, որ ապրիլի 1-ին և մայիսի 1-ին նոր ավտոբուսները կսկսեն սպասարկել ևս 4 երթուղիներ։
Հիշեցնենք` մայրաքաղաքի բյուջեով ձեռք բերված նոր ավտոբուսների առաջին խմբաքանակը՝ 63 ավտոբուս, 2021–ի դեկտեմբերի 12–ից սկսել է աշխատանքը 3, 20, 97, 99 համարների երթուղիներով։ Բոլոր 211 ավտոբուսներով փոխարինվելու է ընդհանուր շուրջ 17 երթուղի:Երևան քաղաքը համայնքի բյուջեով ևս 100 ավտոբուս կգնի 2022 թվականին: Բացի այդ, Եվրամիության գործընկերների հետ վարկային և դրամաշնորհային ծրագրերով կգնվի ևս 100 ավելի մեծ՝ 12-մետրանոց ավտոբուս:
