Ռուսաստանի նախագահ Վլադիմիր Պուտինն ու Ֆրանսիայի նախագահ Էմանուել Մակրոնը գիշերը ևս մեկ հեռախոսազրույց են ունեցել` նվիրված Ուկրաինայում տիրող իրավիճակին, հայտնել է ՌԴ նախագահի մամուլի քարտուղար Դմիտրի Պեսկովը։
Երեկ` փետրվարի 20–ին նույնպես Մակրոնն ու Պուտինը հեռախոսազրույց էին ունեցել։ Ըստ Ֆրանսիական ԶԼՄ–ների տվյալների` այն տևել էր 1 ժամ 45 րոպե։ Ֆրանսիայի և Ռուսաստանի նախագահները հեռախոսազրույցի ժամանակ պայմանավորվել էին աշխատել առաջիկա ժամերի ընթացքում Ուկրաինայի հարցերով եռակողմ աշխատանքային խմբի հանդիպումը կազմակերպելու շուրջ, հայտնել են Ելիսեյան պալատից։
«Երեկ` գիշերը ժամը 1-ի սահմաններում, նախագահ Մակրոնի նախաձեռնությամբ կայացավ Ռուսաստանի և Ֆրանսիայի առաջնորդների երկրորդ հեռախոսազրույցը», – ասել է Պեսկովը։
Մամուլի քարտուղարը նշել է, որ նախագահները շարունակել են քննարկել Ուկրաինայի շուրջ տիրող իրավիճակը։ Պեսկովի խոսքով` առաջնորդները «շեշտել են ԱԳՆ–ների և քաղաքական խորհրդականների գծով երկխոսությունը շարունակելու անհրաժեշտությունը»։
«Առաջիկայում Ռուսաստանի և Ֆրանսիայի միջև շփումներ են հնարավոր նաև արտգործնախարարների մակարդակով», – հավելել է նա։ Կրեմլը չի բացառում նաև ՌԴ նախագահ Վլադիմիր Պուտինի և ԱՄՆ նախագահ Ջո Բայդենի շփումը, անհրաժեշտության դեպքում պետությունների առաջնորդները դա կարող են համաձայնեցնել։
