Ֆրանսիայի նախագահ Էմանուել Մակրոնն ու Ռուսաստանի նախագահ Վլադիմիր Պուտինը հեռախոսազրույցի ընթացքում պայմանավորվել են, որ Արևմուտքը կներկայացնի Ուկրաինայի վերաբերյալ գագաթնաժողովների հնարավոր արդյունքների իր տեսլականը: Այդ մասին լրագրողներին ասել է ՌԴ արտգործնախարար Սերգեյ Լավրովը՝ ամփոփելով Սիրիայի Արաբական Հանրապետության արտաքին գործերի և արտերկրի հայրենակիցների գործերի նախարար Ֆեյսալ Միկդադի հետ բանակցությունների արդյունքները:
Լավրովը նաև նշել է, որ Ռուսաստանը դեմ չէ տարբեր ձևաչափերով Ուկրաինայի վերաբերյալ հանդիպումներին, բայց հանդիպելուց առաջ պետք է հասկանալ, թե ինչ արդյունք կլինի «Նախագահ Մակրոնը նախագահ Պուտինի հետ երեկվա երկու զրույցներում իսկապես արտահայտվել է այդ թեմաներով։ Բայց նախագահ Պուտինը շատ հստակ բացատրել է և մի քանի անգամ է բացատրել, որ մենք դեմ չենք գագաթնաժողովներին, դեմ չենք հանդիպումներին, բայց հանդիպելուց առաջ, հատկապես` այսքան լարված մթնոլորտում, կարևոր է հասկանալ, թե ինչով են վերջանալու այդ գագաթնաժողովները, այդ հանդիպումները, թե ինչպիսին է լինելու արդյունքը»,–ասել է Լավրովը։
Դոնբասում իրադրությունը սրվել է վերջին օրերին, ինքնահռչակ ԴԺՀ-ն և ԼԺՀ-ն հայտարարում են ուկրաինացի ուժայինների կողմից բազմաթիվ գնդակոծությունների մասին:ԴԺՀ-ի և ԼԺՀ-ի ղեկավարությունը հայտնել է քաղաքացիներին Ռոստովի մարզ ժամանակավոր տարհանման մասին՝ կապված Ուկրաինայի ներխուժման սպառնալիքի հետ։ Առաջին հերթին այն վերաբերում է կանանց, երեխաներին և տարեցներին։
Ինչպես հայտարարել է ԴԺՀ-ի ղեկավար Դենիս Պուշիլինը` Ուկրաինայի նախագահ Վլադիմիր Զելենսկին վերջերս զինվորականներին կարգադրել է Դոնբասում հարձակման անցնել:Փետրվարի 19–ին ԴԺՀ-ի և ԼԺՀ-ի ղեկավարները համընդհանուր մոբիլիզացիայի մասին հրամանագրեր են ստորագրել:Արևմուտքից շարունակում են հայտարարություններ հնչել այն մասին, թե իբր Ռուսաստանը սադրանքներ է պատրաստում Ուկրաինայում, չնայած զորավարժություններից հետո ռուսական զորքերը վերադարձել են մշտական տեղակայման վայրեր։
Փետրվարի 14–ին ՌԴ նախագահը հանդիպում է ունեցել արտաքին գործերի նախարար Սերգեյ Լավրովի և պաշտպանության նախարար Սերգեյ Շոյգուի հետ։ ՌԴ պաշտպանության նախարարը Պուտինի հետ հանդիպման ժամանակ զեկուցել է, որ «զորավարժությունների մի մասը մոտենում է ավարտին, մի մասն էլ կավարտվի մոտ ժամանակներս»: ՌԴ Հարավային և Արևմտյան ռազմական շրջանները սկսել են զորքերի վերադարձը տեղակայման վայրեր։
ՌԴ նախագահի մամուլի քարտուղար Դմիտրի Պեսկովը ավելի վաղ լրագրողներին ասել էր, որ զորավարժություններից հետո զինվորականների վերադարձը տեղակայման վայրեր սովորական պրակտիկա է, ոչ մի նորություն չկա, պատասխանելով այն հարցին, թե արդյոք զորքերի հեռացումը նշանակում է Ուկրաինայի շուրջ իրադրության ապաէսկալացիա:
