Արևմուտքին Ռուսաստանի դեմ պատժամիջոցներ սահմանելու համար հիմքեր պետք չեն, ինչ էլ որ Ռուսաստանն անի, ԱՄՆ-ն ու Արևմուտքը պատժամիջոցներ կկիրառեն Մոսկվայի դեմ։ Այս մասին հայտարարել է ՌԴ ԱԳՆ պաշտոնական ներկայացուցիչ Մարիա Զախարովան:
«Շատ կարևոր հարց է, այ հիմա բոլորն են տալիս այդ հարցը․ պատժամիջոցներ, արձագանք, որքա՞ն լայն կտարածվի կատաղության արևմտյան ալիքը։ Բայց մեծ պատրանք էր կարծելը, թե պատժամիջոցներ, կատաղություն և դատապարտում չէր լինի, եթե… անպայման կլիներ»,-ասել է Զախարովան «Соловьев-live» Youtube-ալիքի եթերում։
Իրավիճակը Դոնբասում վերջին օրերին սրվել է, ինքնահռչակ ԴԺՀ-ն և ԼԺՀ-ն հայտարարել են Ուկրաինայի ուժայինների կողմից բազմաթիվ գնդակոծությունների մասին։ Երկու հանրապետությունների ղեկավարները հայտարարել են քաղաքացիների ժամանակավոր տարհանման մասին Ռոստովի մարզ՝ կապված Ուկրաինայի ներխուժման սպառնալիքի հետ։ Փետրվարի 19-ին ԼԺՀ-ի և ԴԺՀ-ի առաջնորդները համընդհանուր զորահավաքի հրամանագրերն են ստորագրել, ապա դիմել են ՌԴ-ին՝ ճանաչման խնդրանքով։
