ՌԴ արտգործնախարար Սերգեյ Լավրովը ԴԺՀ-ի և ԼԺՀ-ի ճանաչումից հետո առաջին անգամ մեկնաբանել է պատժամիջոցները, որոնց միջոցով Արևմուտքը սպառնում է ոչնչացնել Ռուսաստանը։Նախարարը «Россия 24» հեռուստաալիքի եթերում «60 минут» հաղորդման ժամանակ ասել է, որ Արևմուտքի արձագանքը հայտնի է և սպասելի էր։
ՌԴ ղեկավարությունը գիտեր, որ պատժամիջոցներն այսպես թե այնպես լինելու են, ցանկացած դեպքում, առիթով և անառիթ։«Վերջին տասնամյակների ընթացքում նրանք սովորել են բոլոր դժբախտությունները Ռուսաստանի վրա գցել։ Մեզ մեղադրել ամեն ինչի համար։ Այն, որ Մինսկի պայմանավորվածությունների փլուզման մեղքը մեր գործընկերները հիմա փորձում են Ռուսաստանի վրա գցել, մենք նույնպես հասկանում ենք։
Մեր եվրոպացի, ամերիկացի, բրիտանացի գործընկերները կանգ չեն առնի և չեն հանգստանա, քանի դեռ չեն սպառել իրենց բոլոր հնարավորությունները, այսպես ասած՝ «Ռուսաստանին պատժելու» համար։ Արդեն սպառնում են բոլոր հնարավոր պատժամիջոցներով կամ, ինչպես այնտեղ են հիմա ասում, «բոլոր պատժամիջոցների մայրիկով»։ Դե, մենք դրան արդեն սովոր ենք։ Մենք գիտենք, որ պատժամիջոցները սահմանվելու են ամեն դեպքում, ցանկացած պարագայում։ Առիթով և անառիթ»,-ասել է նա։
Ռուսաստանի նախագահ Վլադիմիր Պուտինը փետրվարի 21-ին դիմեց ռուսաստանցիներին և հայտարարեց ԼԺՀ-ի և ԴԺՀ-ի ինքնիշխանությունը ճանաչելու իր որոշման մասին: Նա հայտարարեց, որ Արևմուտքը շանտաժի է ենթարկում Ռուսաստանին՝ սպառնալով պատժամիջոցներով, սակայն դրանց համար առիթ միշտ էլ կգտնվի կամ կհորինվի։ Կոչից անմիջապես հետո ՌԴ նախագահը Կրեմլում ստորագրեց ԼԺՀ-ի և ԴԺՀ-ի ճանաչման մասին հրամանագրերը։
