2022 թվականին ՀՀ 13 համայնքներում 15 սուբվենցիոն ծրագրերի իրականացման համար ՀՀ կառավարությունը մարզպետարաններին 1 մլրդ 435 մլն դրամ է հատկացնում։Այսօր կառավարության նիստում այս մասին հայտնեց ՀՀ տարածքային կառավարման և ենթակառւցվածքների նախարար Գնել Սանոսյանը։
«Բաշխվածությունը հետևյալն է. Արագածոտնի մարզում` 4 մլն, Արարատի մարզում` 42.5, Արմավիրում` 28 մլն, Գեղարքունիքում` 145, Լոռու մարզում` 38, Շիրակում` 23 և Սյունիքի մարզում 1 ծրագիր է, բայց 1 մլրդ 181 մլն դրամ արժողությամբ»,– ասաց Սանոսյանը` պարզաբանելով, որ ծրագիրը վերաբերում է Քաջարանի բազմաբնակարան 25 շենքերի էներգախնայողության բարձրացմանը։
Ծրագրի ֆինանսավորմանը ՀՀ կառավարությունը մասնակցում է 70 տոկոսով, մնացած 25 տոկոսը հատկացվում է ՄԱԿ–ի զարգացման ծրագրերով, համայնքը ծրագրի ֆինանսավորմանը մասնակցում է 5 տոկոսով, որի կեսը` 2.5 տոկոսը տրամադրելու է Զանգեզուրի պղնձամոլիբդենային կոմբինատը` որպես համայնքի հովանավոր։Սանոսյանը հայտնեց, որ ծրագրերի հիմնական ուղղություններն են մանկապարտեզների հիմնանորոգումն ու կառուցումը, խմելու ջրագծերն ու ճանապարհները։
«Այս 3 ուղղությամբ ամենաշատ հայտերն ունենք այս տարի»,– ասաց ՍանոսյանըՆշենք, որ համայնքներին սուբվենցիաների տրամադրման գործընթացը ՀՀ կառավարությունը նախաձեռնել է 2018 թվականից: Մինչև 2021թ–ը իրականացվել է 600 ծրագիր, 2021-ին՝ ևս 673 ծրագիր: Համայնքների հետ կնքված սուբվենցիայի տրամադրման մասին պայմանագրերի գործողության ժամկետը երկարաձգվել է մինչև 2022 թվականի հոկտեմբերի 1-ը՝ եղանակային ոչ բարենպաստ պայմանների և կատարված աշխատանքների որակի պահպանման պատճառով:
